100 мянган айлын орон сууц хөтөлбөрийн хохирогчид ирэх лхагва гаригаас эхлэн өлсгөлөн зарлахаа албан ёсоор мэдэгдээд байна. Сүхбаатарын талбайд одоогоор хорь гаруй хүн суулт хийхээр ирээд байна.

Тэдний суулт цуглааныг дэмжиж ирэгсдийн тоо нэмэгдсээр байлаа. Урьдчилсан байдлаар долоон хүн өлсгөлөн зарлахаар гарын үсгээ зурж эрүүл мэндийн шинжилгээ хийлгэхээр явсан гэдгийг албаны эх сурвалж мэдэгдлээ.

Эрүүл мэндийн шинжилгээнүүдэд хамрагдаж ходоодоо цэвэрлүүлээд өлсгөлөн зарлах учраас  дээрх долоон хүн уг суултад оролцохгүй юм байна. Орон сууцтай болохын тулд хашаа байшин, машин тэргээ зарж чемодантай хувцсаа бариад ах дүү нарынхаараа толгой хорогдож сүүлдээ арга мухардаж ийнхүү өлсгөлөн зарлахаар долоон хүн шийдсэн аж.

Суултад оролцож байгаа иргэдийн хувьд “Бидний байр 100 хувь ашиглалтанд орсон”, “Бид төрөөс халамж хүсээгүй, зээл хүсэгчид”, “Ц.Элбэгдорж Ерөнхийлөгч иргэдээ өлсгөлөнд хүргэлээ” зэрэг бичгүүд барьжээ. Сүхбаатар дүүргийн цагдаа нар суулт хийхээр ирсэн иргэдийн гэрийг бариулахгүй хэмээн багагүй маргаан дэгдсэн.

Г.Сувд: Сүхбаатар дүүрэгт болон цагдаагийн газар албан бичиг өгсөн
-Сүхбаатар дүүргээс суулт хийж гэр барих зөвшөөрөл албан ёсоор хүссэн юм уу?
-Албан бичиг өгсөн. Хуулиараа бол гурав хоногийн өмнө мэдэгдсэн байх ёстой. Гуравдугаар сарын 6-нд Сүхбаатар дүүрэгт болон дүүргийн цагдаагийн газар албан ёсоор бичиг өгсөн. Харин бидэнд хаанаас нь ч хариу өгөөгүй. Зөвшөөрөл олгохгүй гэж хариу өгөөгүй учраас бидний хувьд зөвшөөрсөн гэж үзэж байгаа.

-Барилгын компаниуд алданги тооцоод эхэлчихсэн гэсэн үү?
-Тийм ээ. Байр нь ашиглалтанд ороод бэлэн болчихсон учраас барилгын компаниуд иргэдэд алданги тооцож байна. Сард 640 мянган төгрөг төл гэж шаардаж байна шүү дээ. Хашаа байшингаа зарчихсан учраас орох орон байхгүй. Эргээд мөнгөө авъя гэхээр барилгын компаниуд мөнгөнөөс нь хувь авна гэж байна. Засгийн газрын бодлого иргэдээ хэрхэн дэмжих вэ гэж баймаар юм. Гэтэл өнөөдөр яаж хашаа байшингаас нь салгаж гудамжинд гаргаж болдогийг харуулж байна шүү дээ.

-Хоёр хоног суулт хийгээд гурав дахь өдрөөс өлсгөлөн зарлана гэсэн үү?
-Тийм.

Т.Мягмарсүрэн: 4000-хан хүний асуудал шийдэж чадахгүй юм бол Засгийн газар гэж байгаад ч яах юм
-Таны хувьд хэдэн төгрөгний байр захиалсан бэ. Урьдчилгаанд нь хэдэн төгрөг төлсөн бэ?
-“Эко” констракшны байранд 32 ам.метр квадрат байр захиалсан. Урьдчилгаанд нь таван сая төгрөг төлсөн. Ам бүл хоёулаа. Амьдралаа эхлүүлэх гээд явж буй залуус хүмүүсийн л төлөөлөл юм даа. Өнөөдөр Монгол Улсын Засгийн газар 100 мянган айл орон сууц хөтөлбөрийг хэрэгжүүлнэ гээд л байсан. Тухайн үед одоогийн Ерөнхий сайд Н.Алтанхуяг Шадар сайдаар ажиллаж байсан хүн учраас бид энэхүү шаардлагыг тавих эрхтэй. Ер нь тэгээд 4000-хан хүний асуудал шийдэж чадахгүй юм бол Засгийн газар гэж байгаад ч яах юм билээ. Өнөөдөр эдгээр хохирчихоод байгаа 4000 хүний ард 3-5 ам бүл байгаа гэж бодохоор 12.000-20.000 хүний эрх ашиг хөндөгдөж байгаа шүү.

- Захиалсан байраа нь ашиглалтанд орчихсон уу. Барилгын компаниас ямар шаардлага тавьж байгаа вэ?
-Аль хэдийнэ ашиглалтанд орсон. Барилгын компанийн хувьд өнөөдөр аз болоход бид бүхнийг шахаж шаардахгүйгээр харзнаад байж байгаа байхгүй юу. Гэтэл бас л өндөр хүүтэй зээл авч барилга барьсан байж таараа. Тийм болохоор аль болох түлхүүрээ иргэддээ хурдан өгч мөнгөө авмаар л байгаа шүү дээ.

-Суултанд оролцож байгаа хүмүүсийн хувьд ямар барилгын компаниудад байр захиалсан бол?
-Арав гаруй компани бий. “Зад”, “Эко”, “Жонаттан”, “Буянбилэг”, “Есөнбүрд”, “Ноёд” групп зэрэг компаниудад байр захиалсан хүмүүс байгаа.

Б.Одонтуяа: Байраа хүлээж байтал миний нөхөр бурхан болчихлоо
-Та хэзээ байр захиалсан бэ?
-100 мянган айл хөтөлбөр зарлагдаж эхэлсний дараахан “Эко” констаркшнд байр захиалсан. Нэг ам.метр квадрат нь 1.400.000 төгрөг гээд 30 ам.метр квадраттай байр захиалсан. Урьдчилгаанд нь дөрвөн сая 650 мянган төгрөг төлсөн. Би гэрээ байгуулахдаа бүгдийн уншиж үзээгүй л дээ. Гэтэл Төрийн банкны санхүүжилт шийдэж өгөөгүй тохиолдолд өгсөн мөнгөний арван хувийг авна гээд заачихсан байсан юм билээ.
Энэ бол арай дэндүү байгаа байхгүй юу. Ард иргэдийн мөнгийг өчнөөн удаан хугацаанд эргэлдүүлж ашгаа олчихсон болохоор байж яахаараа барилгын компаниуд өнөөдөр хувь авдаг юм бэ. Төрийн банк анхнаасаа хүч хүрэхгүй гэдгээ мэдэж байсан бол шууд зогсоох ёстой байсан. Иргэдийг ингэж шалгаж байна гэж удаан хүлээлгэх шаардлагагүй байсан. Захиалга өгснөөс хойш жил хагасийн нүүр үзэж байна.

-Таны хувьд одоо хаана амьдарч байгаа вэ?
-Миний хувьд хөдөө ажилладаг. Охин маань хотод сургуульд явдаг. Байраа хүлээж байтал миний нөхөр бурхан болчихлоо. Залуу гэр бүлийн хувьд энэ бол маш том гарз. Орон байргүй учраас хоёр тусдаа амьдарч ажиллаж байсан. Миний нөхөр төрийн албанд ажилладаг байсан. Бид нар шударгаар хөдөлмөрлөж явсны үр дүнд өнөөдөр ингэж хоосон хоцорсон. Хэрвээ шударга бус байгаад хүмүүсийг хулхидаад албан тушаалаа ашигласан бол өнөөдөр толгой хорогдор байртай л байх байсан. Аль болох шударгаар амьдаръя л гэж хүссэн.
Хэрвээ энэ асуудал шийдэгдчихсэн байсан бол бид хамтдаа байгаад амьдрал минь яах ч байсан юм билээ. Зөвхөн би гэлтгүй бусад хүмүүсийн зовлон сонсвол зүрх өвдмөөр амьдарч яваа хүмүүс маш олон бий. Бид өнөөдөр төрийн олгирахиудын амьдарч буй орон сууцны жорлонгийн өрөөтэй тэнцэх байр л хүсч байгаа шүү дээ. Өнөөдөр иргэдийн орон сууц захиалах чадвар нь л энэ.

Б.Ирээдүй