Барилгын улирал эхэллээ. Бэлтгэлээ хангаж дууссан уу?
Barilga
2019-11-05
Урин дулаан цаг ирж барилгын компаниуд хөл хөдөлгөөнд орж эхэллээ. Хүйтэн сэрүүний улиралд барилгын ажил зогсож амралтын байдалтай байдаг бол зарим компаниуд энэ хугацааг ажилтнуудаа сургах, туршлага солилцох, мэргэжил дээшлүүлэх, ирэх хаврынхаа ажлыг амжилттай эхлүүлэхэд зориулдаг билээ.
Үүний нэг жишээ бол Премиум Конкрит ХХК-ийн ажилчдын төлөөллөөс 10 ажилтан энэ оны 1 сарын 1-7-ны өдрүүдэд Хятад Улсын нийслэл Бээжин хотноо амарч аялангаа ижил төстэй үйл ажиллагаа явуулдаг компаниудтай танилцан, туршлага судалжээ.
Аялалын үеэр Бээжин хотоос 200 гаруй километрийн зайд орших, бетон зуурмагийн YANG XIANG SHANG TONG үйлдвэрт зочилсон бөгөөд 1 сард буюу хүйтэн сэрүүний нөхцөлд бетон зуурмаг зуурч байгааг нь сонирхож арга технологиос нь суралцан, өөрийн үйл ажиллагаандаа хэрэгжүүлэх шинэ санаа, аргатай иржээ.
Премиум Конкрит бетон зуурмагийн үйлдвэрийн хувьд байгуулагдаад удаагүй болохоор суралцах сайжруулах зүйл чамгүй байсан ажээ.
Премиум Конкрит Компанийн хувьд лаборатори нь олон улсад хүлээн зөвшөөрөгдсөн HUMBOLDT фермийн тоног төхөөрөмжөөр тоноглогдсон байдгаараа давуу талтай бол YANG XIANG SHANG TONG бетон зуурмагийн үйлдвэрийн дагалдах лабораторууд төнөг төхөөрөмж сайтай, бетон зуурмаг, дүүргэгч материал, цемент, химийн шинжилгээ хийх боломжтой иж бүрэн лабораторитой байсан байна.
Хятад улсдаа томоохонд тооцогдох, олон жилийн түүхтэй тус үйлдвэрээс давуу тал ихтэй үндэсний үйлдвэр маань цаашид тус үйлдвэр шиг химийн шинжилгээ хийдэг болохоор судалгааны ажлаа хийж эхлээд байгаа аж.
Барилгын улирал эхэллээ. Хаврын бэлтгэлээ өвөлдөө бүрэн хангасан компаниуд эхний захиалгаа хүлээн авахад бэлэн байгаа гэдэгт итгэлтэй байна.
Дашрамд дурдахад, Премиум Конкрит ХХК нь сэрүүний улирал болох 3 болон 11 сард бетон үйлдвэрлэх боломжтой үйлдвэрийг ашиглалтанд оруулаад, туршилтын ажлаа эхлүүлсэн тухай мэдээлэл барилгын салбарынхныг баярлуулж байсан билээ.
Ж.Оюунчимэг