Хэрэглэгчдийг цахилгаан эрчим хүчээр хангаж буй компани, аж ахуйн нэгж байгууллагаас хэрэглэгчдэд үзүүлэх үйлчилгээнд тавих шаардлагыг тогтоосон «Цахилгаанаар хангагчаас хэрэглэгчдэд үзүүлэх үйлчилгээний шаардлага» стандартыг энэ сарын 15-наас мөрдөж эхэлсэн байна.

Энэхүү стандартыг Эрчим хүчний зохицуулах газраас санаачлан боловсруулж, эрчим хүчний салбарын техникийн хороогоор хэлэлцэж, Стандартчилал, хэмжил зүйн үндэсний Зөвлөлийн тогтоолоор баталжээ. Цахилгаанаар хангагчаас хэрэглэгчдэд үзүүлэх гол үйлчилгээнүүдийн хамгийн их хугацааг тогтоосон энэхүү стандарт нь хэрэглэгчдэд техникийн нөхцөл олгох, цахилгаан түгээх сүлжээнд холбох, цахилгаан хангамжийн талаар хэрэглэгчээс ирүүлсэн өргөдөл, гомдолд хариу өгөх, хэрэглэгчийн хүсэлтээр техникийн үйлчилгээ хийх, цахилгаан хангамжийн тасралтын үргэлжлэх хугацаа, тасралтыг сэргээх, тоолуур баталгаажуулах, бичилт хийх хугацаа гэсэн таван үндсэн хэсгээс бүрджээ.