Эрхэм хүндэт барилгачид аа.

Барилга, барилгын материалын үйлдвэрлэлийн салбарт ажиллагсад, нийт инженер техникийн ажилтнуудад  шинэ жилийн баярын мэнд хүргэж, аз жаргал сайн сайхан бүхнийг хүсэн ерөөж мэндчилье.
Салбарын өмнө тулгамдсан асуудлыг шийдвэрлэх, УИХ-аас баталсан томоохон хөтөлбөрүүд, шинэчлэлийн Засгийн газраас дэвшүүлсэн зорилтыг хэрэгжүүлэх зорилгоор Барилга, хот байгуулалтын яам байгуулагдан ажиллаж байна.
Өнгөрсөн хугацаанд салбарын эрх зүйн зохицуулалтыг  боловсронгуй болгох, төрийн болон төрийн бус байгууллагуудын хариуцах ажлын хүрээг оновчтой болгож, барилга, барилгын материалын үйлдвэрлэлийг хөгжүүлэх, барилгын ажил эхлэх, үргэлжлүүлэхэд шаардлагатай гарын үсгийн тоог бууруулах зэрэг ажлуудыг хийлээ. 
Иргэдийг орон сууцжуулах, ипотекийн зээлийн тогтолцоог бий болгох ажлыг удирдан зохион байгуулах Үндэсний хороо байгуулагдлаа. Шинээр байгуулагдах 17 хорооллын инженерийн шугам сүлжээ, дэд бүтэц байгуулах Засгийн газрын тогтоолын төслийг шинэчлэн найрууллаа.
Барилгын материалын үйлдвэрлэлийг дэмжих хөтөлбөрийг Засгийн газрын хуралдаанд оруулж, Хөгжлийн банкинд санхүүжилт шаардлагатай  20 гаруй үйлдвэрийн төсөл хүргүүлээд байна.
Хот төлөвлөлт, байгуулалтын асуудалд хандуулж,  хот төлөвлөлтийн норм, дүрмийг шинэчлэн боловсруулж, хуульчлан мөрдүүлэх зорилт тавин ажиллаж байна. Хот байгуулалтын хуулийг шинэчлэн боловсруулахаас гадна хотыг дахин хөгжүүлэх, ногоон байгууламжийн тухай зэрэг багц хуулийг  шинээр боловсруулж УИХ-д өргөн барихад бэлэн боллоо.
Ирж байгаа  2013 онд  барилга, хот байгуулалтын салбарт хийж хэрэгжүүлэх олон ажил бий.  Барилгын салбарт шинэ техник,  технологи нэвтрүүлэх, норм, нормативыг олон улсын түвшинд ойртуулах, импортын бүтээгдэхүүнийг орлосон үндэсний үйлдвэрийг байгуулах,  мэргэжилтэй ажилтан  бэлтгэх, барилгын үйлдвэрлэлийг цаг уурын эрхшээлээс гаргах,  барилга байгууламжийн өөрийн өртгийг хямдруулах шаардлага байна.
2013  онд манай салбарт 186 тэрбум төгрөгийн хөрөнгө оруулалтын ажил  хийгдэнэ. Та бид хамтдаа 10 аймгийн төвийн инженерийн байгууламж, шугам сүлжээг шинэчлэх шинээр байгуулах, 2 аймгийн төвийн хөгжлийн ерөнхий төлөвлөгөөнд тодотгол хийнэ.
21 аймгийн төвийн хэсэгчилсэн ерөнхий төлөвлөгөөг шинээр боловсруулна.  Аймаг, нийслэл бүсийн тулгуур төвүүдэд барилгын материалын жижиг дунд үйлдвэрлэлийг хөгжүүлэхэд дэмжлэг үзүүлж,  барилгын материалын иж бүрэн лаборатори байгуулна.
Шинээр тавигдахаар төлөвлөж буй төмөр замын дагуу GPS-ийн сүлжээ байгуулах,  1:25000 масштабтай  байр зүйн зураглал хийх, Улаанбаатар хотын бүсчлэлийн төлөвлөлт, инженер-геологийн судалгаа, газар хөдлөлийн мужлалын, газар дээрхи болон доорхи зураглал хийж, мэдээллийн сан үүсгэх гэх зэрэг ажил хийх  юм.
Салбарын хэмжээнд хийхээр төлөвлөсөн эдгээр болон бусад ажилд гар нийлэн хамтарч ажиллахыг та бүхнээсээ хүсэж байна.
 
Ирэх  2013 ондоо эрч хүчтэй, амжилт бүтээлээр дүүрэн байхыг хүсье.
УИХ-ын гишүүн, Засгийн газрын гишүүн,
Барилга, хот байгуулалтын сайд Ц.Баярсайхан