Улаанбаатар хотын оффисын зах зээлийг дээрх байдлаар зэрэглэлийн хувьд Grade A, Grade B, Grade C гэсэн 3 зэрэглэлд, байршлын хувьд Энхтайвны өргөн чөлөө, Хотын төв, Хүүхдийн парк, Баянзүрх болон бусад гэж хувааж үзнэ.

2012 оны 10-р сарын байдлаар Улаанбаатар хотын зах зээлд оффисын зориулалтаар түрээслэгдэж буй барилга байгууламжийн 13% нь А зэрэглэл, 32% нь B зэрэглэл, 55% нь C зэрэглэлийн оффис байна.

Оффис түрээслэх үнэ:

Улаанбаатар хотын оффисын түрээсийн дундаж үнэ 32.3 мянган төгрөг буюу өмнөх сарынхаас 4,2%-иар өссөн   дүнтэй байна. Уг өсөлт нь хотын төв хэсэг орчмоор ашиглалтанд орж буй болон баригдаж буй оффисын захиалга авч эхэлсэнтэй холбоотой байх талтай.

Оффис түрээсийн хувьд Улаанбаатар хотын хэмжээнд нийт 30-аад оффис түрээслэгдэж байгаа бөгөөд байршлын хувьд хотын төв хэсэгт байрлах оффисууд байршил болон зэрэглэлээсээ хамаарч хамгийн өндөр үнэтэй бөгөөд дунджаар 46.0 мянган төгрөг, Энхтайвны өргөн чөлөө орчимд байрлах оффисуудын дундаж түрээсийн үнэ 37,3 мянган төгрөг, Баянзүрх орчим байрлах оффисын дундаж түрээсийн үнэ дунджаар 25.0 мянган төгрөг харин эдгээр байршилд хамаарахгүй бусад оффисуудын үнэ дунджаар 19,5 мянган төгрөг байна.

Зэрэглэлийн хувьд A зэрэглэлийн оффисын түрээсийн дундаж үнэ 66.2 мянган төгрөг,  B зэрэглэлийнх 42.3 мянган төгрөг, C зэрэглэлийн оффисын түрээсийн дундаж үнэ 21.2 мянган төгрөг байна.

Оффис худалдаалах үнэ:

Улаанбаатар хотын төв хэсгээр 2013 оны 3-р улирал хүртэл ашиглалтанд орох нийт 48300м² бүхий  13 оффис худалдаалагдаж байгаа бөгөөд худалдаалах дундаж үнийн хувьд  м² нь 4.27 сая төгрөг байна.