Канадаас манай улсад суугаа онц бөгөөд бүрэн эрхэт элчин сайд Анна Биолег, Канадын стратегийн дэд сайдын орлогч Дрью Пеген нар ЗТБХБ-ын сайдыг өөрийн орондоо айлчлахыг урилаа. Мөн тэд барилгын, тэр дундаа канад хаусын технолог судалж, суралцах боломж монголчуудад байгааг онцлон тэмдэглэв. ЗТБХБ-ын яамныхан төдийгүй, хувийн хэвшлийн салбарт ажиллаж байгаа залуусаа манай улсад сургаж дадлагажуулаад, канад хаус төслөө хэрэгжүүлэхийг хүсч байгаагаа сайд Х.Баттулгад ярьсан юм. Мөн Монголд барих шинэ нисэх онгоцны буудлын төслийг тус улс сонирхож байгаа ажээ.

ЗТБХБ-ын сайд Канадын стратегийн дэд сайдын орлогч Дрью Пегентэй уулзах үеэрээ Төв аймгийн Батсүмбэр суманд канад хаус барьж, жишиг сум болгохоор төлөвлөж байгаагаа ярив. Хоёр орны цаг агаар, уур амьсгал нь төстэй учир канад хаус барих боломжтой, тийм учраас хөдөөгөөс сонгогдсон УИХ-ын гишүүдтэй хамт тус улсад айлчилж “Канад хаус” төслийг ажил хэрэг болгоно гэж сайд хэллээ.