“Кэй энд Ти констракшн” ХХК нь Баянзүрх дүүргийн 12, 13-р хороонд байрлах гэр хороололд дахин төлөвлөлт хийж, “Аман хуур” дижитал хорооллыг сүндэрлүүлэн босгохоор барилгын ажлаа жил гаруйн өмнө эхэлсэн бөгөөд одоо эхний ээлжийн барилгууд нь 80 хувийн гүйцэтгэлтэй явж байгаа аж.

Голомт банк “Кэй энд Ти констракшн” ХХК-тай уг шинэ хорооллын нийт 282 айл өрхөд орон сууцны урт хугацааны зээл олгохоор хамтран ажиллах гэрээ байгуулжээ. Гарын үсэг зурах арга хэмжээний үеэр Голмт банкны байгууллагын банкны газрын захирал Л.Оюун-Эрдэнэ “Манай банк Кэй энд Ти констракшн компанитай хамтын ажиллагааны гэрээ байгуулснаар шинэ бүтээн байгуулалтыг дэмжихийн зэрэгцээ Улаанбаатар хотод тулгамдаж буй агаарын бохирдол, хөрсний бохирдлыг багасгах, хүн амыг орон сууцжуулж амьдрах орчны тав тухыг хангахад чиглэсэн ажилд зохих хувь нэмэр оруулах болсондоо баяртай байна” гэлээ.

Гэр хорооллыг орон сууцжуулж тохилог хороолол барих ажлыг нь санхүүгийн хүнд хэцүү үеэс үл хамааран дэмжиж байгаад талархаж буйгаа тус компанийн тэргүүн дэд захирал Чэн Чун Хунг илэрхийлээд барьж буй барилгынхаа чанар болон хугацаанд нь ихээхэн анхаарах болно гэдгээ амлажээ.

БЗД-ийн “Аман хуур” дижитал хороололд шинээр оршин суух иргэд байрныхаа үнийн дүнгийн 50 хувийг төлснөөр үлдэх санхүүжилтийг Голомт банкны сарын 1.17%-ийн хүүтэй 10 жилийн хугацаатай зээлээр шийдэх боломжтой болж байна. Дашрамд дурдахад Голомт банк 2003 оноос орон сууцны урт хугацааны зээл олгож эхэлсэн бөгөөд 4000 гаруй айл өрхийг орон сууцжуулсан байна