Мэдээллийн технологийн үндэсний паркад “Барилгын салбарын борлуулалт” сэдэвт семинарыг Монголын барилгын нэгдсэн веб “BARILGA.MN”, барилгын зөвлөгөө мэдээллийн төвөөс амжилттай зохион байгууллаа. Хэдийгээр байгуулагдаад удаагүй байгаа ч барилгын салбарыг сонирхогч хэн бүхний танил болоод байгаа тус веб лавлахаас барилгын байгууллагуудын борлуулалтыг нэмэгдүүлэх чиглэлд анхлан семинар зохион байгуулж буй нь энэ юм.
Барилгын болоод банк санхүүгийн чиглэлд үйл ажиллагаа явуулдаг 60 гаруй аж ахуйн нэгж байгууллагын төлөөлөгчид хүрэлцэн ирсэн уг семинар халуухан яриагаар дүүрэн байлаа. Семинарын эхэнд “Е-Монгол” компаний төлөөлөгч интернэт маркетингийн талаар ярилцсан бол “Пи Ар бол дайчин Реклам бол манаач” сэдвийн дор Удирдлагын академийн багш Б.Энхболд барилгад PR-ыг хэрхэн хэрэглэж болох талаар өөрийн санал бодлоо хуваалцсан нь цугласан олны таашаалд ихээхэн нийцсэн юм. Мөн “Анод” банкны төлөөлөгчид орон сууц болон барилгын бизнест олгож байгаа зээлийнхээ талаар танилцуулга хийлээ. Эцэст нь “BARILGA.MN”, барилгын зөвлөгөө мэдээллийн төвийн захирал Г.Батсүх хаалтыг хийснээр семинар амжилттай болж өндөрлөсөн юм.
Хүний амьдрах үндсэн суурь хэрэгцээ бол яах аргагүй тав тухтай амьдралыг бий болгох орон сууц мөн. Монгол айл өрх бүр өөрийн гэсэн байр сууцтай, түүнийгээ эдийн засгийн эргэлтэнд чөлөөтэй оруулдаг болсон цагт эдийн засгийн хөгжлийн тухай яривал сайхан. Чухамхүү Монгол айл гэр болгон орон сууцтай болох гэсэн эрэлт хэрэгцээг хангах мэдээлэл болгоныг “BARILGA.MN” Монголын барилгын нэгдсэн веб лавлах та бүхэнд хүргэхийн төлөө хүчин чармайлт гарган ажиллаж байгаагийн нэгээхэн хэсэг нь тус семинар болсон юм.