Барилга, хот байгуулалтын сайд Ж.Наранцацралт Израиль улсаас Монгол Улсад суугаа Онц бөгөөд Бүрэн эрхт Элчин сайд Амос Надаитай уулзах үеэр "40 мянган орон сууц" хөтөлбөрийн хэрэгжилт, санхүүжилтийн талаар түлхүү ярилцжээ. Израиль улсын хувьд төдийлөн олон оронд хөрөнгө оруулалт хийгээд байдаггүй ч Зүүн Европын зарим орон, тухайлбал Унгар улсад одоогоор нэг тэрбум орчим ам.долларын хөрөнгө оруулаад байгаа аж.

Түүнчлэн манай хөдөө аж ахуйн салбарт мэргэжилтэн бэлтгэж байгаа, цаашид бусад салбаруудад ч технологи нэвтрүүлэх, туршлага солилцох, мэргэжилтэн бэлтгэх чиглэлээр хамтран ажиллах сонирхолтой байгаагаа Элчин сайд Амос Надаи тэмдэглэсэн байна. Мөн тэрбээр хоёр орны барилгын салбар дахь хамтын ажиллагааг хөгжүүлэх гүүр болж, боловсон хүчин бэлтгэх болон "40 мянган орон сууц" хөтөлбөрт хувь нэмэр оруулах боломжтой байгаагаа илэрхийлжээ.