БАРИЛГА, ХОТ БАЙГУУЛАЛТ, НИЙТИЙН АЖ АХУЙН ҮНДЭСНИЙ ТӨВИЙН ДАРГЫН ТУШААЛ

2008 оны 07 сарын 08 өдөр                                      Дугаар 162                                       Улаанбаатар хот

Сүүлийн үед боловсруулагдаж байгаа барилга байгууламжийн зураг төсөл нь архитектур төлөвлөлтийн шаардлага хангахгүй, барилгын үндсэн бүтээц, эрчим хүч, уур ус, материалын тооцоо судалгааг холбогдох норм, барилгын нормативын баримт бичгийн шаардлагын дагуу тооцож сонгож боловсруулаагүйгээс иргэдийн ажиллаж, амьдрах таатай нөхцлийг хангахгүй, ашиглалтын зардал болон барилгын өртөг өндөр, шаардлага хангахгүй материалаар чанаргүй барилга байгууламжийг барьж байгааг таслан зогсоох зорилгоор “Барилгын тухай хууль”-ийн 6 дугаар зүйлийн 2 дахь хэсгийн 1 дүгээр заалтыг үндэслэн ТУШААХ нь:

Нэг. Зураг төсөл боловсруулах эрх бүхий байгууллага аж ахуйн нэгжийн дарга /захирал/ нарт дараахь арга хэмжээг хэрэгжүүлж ажиллахыг үүрэг болгосугай:

1.1. Барилга байгууламжийн зураг төслийг боловсруулахдаа газар олголтын шийдвэр, газрын дэвсгэр зураг, техникийн нөхцөл, инженер хайгуулын дүгнэлт зэрэг баримт бичгийг бүрдүүлсэн байх бөгөөд батлагдсан (архитектур төлөвлөлтийн даалгавар) зургийн даалгаврын дагуу төлөвлөлтийн болон инженерийн оновчтой шийдлийг тусгаж боловсруулсан эскиз, техникийн зургийг холбогдох мэргэжлийн байгууллагатай зөвшөөрөлцсөн буюу бэлтгэл үе шатны ажил хангасан зураг төслийг боловсруулж байх;

1.2. Барилгын тухай хуулийн 10 дугаар зүйлд заасан шаардлага хангасан зураг төсөл боловсруулах, норм, нормативын баримт бичгийн дагуу ус, эрчим хүчний хэмнэлттэй, барилга байгууламжийн байршлаас хамаарсан орчны орон зайн төлөвлөлт, бүтээц, хийц, дулаан, ус, цахилгаан, холбоо зэрэг зураг төслийн хэсэг тус бүрийг тооцоо судалгааны үндсэн дээр төлөвлөж байх;

1.3. Зураг төсөлд материал түүхий эд, тоног төхөөрөмж, технологийг стандартын шаардлага, лабораторийн шинжилгээ туршилт, сорилт, баталгаажилтыг үндэслэн эрүүл ахуй, экологи, галын аюулгүй байдлын арга хэмжээнүүдийг оновчтой сонголттойгоор тусгаж байх;

1.4. Монгол Улсын Засгийн Газрын 2002 оны 28 дугаар тогтоолоор баталсан Улаанбаатар хотын 2020 он хүртэл хөгжүүлэх ерөнхий төлөвлөгөө, Хот байгуулалтын тухай хуулийн 10 дугаар зүйл, “Газрын тухай хууль”-ийн 51 болон 56 дугаар зүйл, “Орон сууцны тухай хууль”-ийн 9 дүгээр зүйл, “Хот суурины ус хангамж, ариутгах татуургын ашиглалтын тухай хууль”-ийн 12 дугаар зүйл, “Усны

тухай хууль”-ийн 31 дүгээр зүйл,   “Эрчим хүчний тухай хууль”-ийн 33 дугаар зүйлийг тус тус зөрчиж олгогдсон газарт барилга байгууламжийн зураг төсөл боловсруулахгүй байх;

1.5. Орон сууц, олон нийтийн барилгын ус хангамж, эрчим хүчний тоног төхөөрөмж нь ус, эрчим хүчний хэмнэлттэй зарцуулах технологитой байх. Цахилгаан, дулаан эрчим хүчний хэмнэлттэй тоноглол сонгож стандартыг нь тодорхойлж түүвэрт тусгаж байх;

Хоёр. Барилга угсралтын ажил гүйцэтгэгч нар дараах даалгаврыг хэрэгжүүлж ажилласугай:

2.1. Барилгын ажлыг гүйцэтгэх тусгай зөвшөөрөлтэй аж ахуйн нэгж нь барилга угсралтын талбайн зохион байгуулалтаа хөдөлмөр хамгаалал, эрүүл ахуй, экологи, галын аюулгүй байдлын шаардлага нөхцлийг иж бүрэн шийдвэрлэсэн, барилга угсралтын ажлын эхлэх, үргэлжлэх зөвшөөрөлтэй, баталгаажсан зураг төсөл зэрэг бэлтгэл үе шатны ажлыг бүрэн хангасны дараа барилгын ажил гүйцэтгэх;

2.2. Барилгыг байнгын ашиглалтанд өгөх хүртэлх хугацаанд түр хашаа болон барилгын талбайн зохион байгуулалтыг хотын өнгө үзэмжид нийцэхүйц цэвэр үзэмжтэй байлгахаас гадна барилгын талбайн гаднах орчны зам талбай, тохижилт, цэцэрлэгжилт зэргийг барилгын ажил эхлэхээс өмнөх хот тохижилтын тухайн нөхцлийг бууруулахгүйгээр засах, барилгын хог хаягдал, нунтаг материал, шороог ил задгай хаяж орхихгүй, явган болон авто замын газар хэвийн зорчих нөхцлийг хангаж ажиллах;

 2.3. Барилга угсралтын ажилд хэрэглэх бүх төрлийн барилгын материал, тоноглол нь Барилгын тухай хуулийн 11 дүгээр зүйлд заасан шаардлага хангасныг нотлох дотоодын болон импортын бараа бүтээгдэхүүний гарал үүслийн гэрчилгээтэй байхаас гадна манай орны эрс тэс уур амьсгалд зохицсон эсэхийг тодорхойлж баталгаажсан лабораторийн сорилт туршилтын дүгнэлтийг гаргасны дараа барилга угсралтын ажилд хэрэглэж байх;

2.4. Салхинд хийсч агаар орчныг бохирдуулж байгаа газрын гадаргын бохирдсон сул хөрсний нилээд хувийг барилга угсралтын ажлын явцад хүнд машин механизмаар эвдэгдсэн газар, ил задгай хурааасан барилгын савлагдаагүй нунтаг материал, түүний хог хаягдал эзлэж байгааг цэгцэлж, барилгын талбай дээр технологийн зориулалт бүхий стандартын сав баглаа боодолтой нь саравч, агуулахад хадгалж ашиглах;

2.5. Барилга угсралтын ажлын нилээд хувьд нь бетон болон шавардлагын зуурмагийг барилгын талбай дээр шууд бэлтгэж байгаа бөгөөд 1 м3 бетоны орцонд нормоор 0.2м3 ус шаардагддаг. Сүүлийн үед 9-өөс дээш давхар, цутгамал төмөр бетон бүтээцтэй барилга ихээхэн хэмжээгээр баригдаж байна. Зөвхөн нэг 9 давхар барилгын бүтээц, хийцэд ойролцоогоор 524м3 бетон зуурмаг, түүнд 104.8м3 ундны цэвэр ус хэрэглэж байгаа тооцоо гарч байгаа тул барилга угсралтын технологид хэрэглэх усыг хэмнэх, ашигласан усыг цэвэршүүлж эргүүлэн ашиглах арга хэмжээ авах;

Гурав. Захиалагч болон хөрөнгө оруулагч нарт дараах арга хэмжээ авахыг үүрэг болгосугай:

3.1. Барилга байгууламжийн хөрөнгө оруулагч нь барилгын салбарын хууль эрх зүйн болон техникийн шаардлага, хот байгуулалтын ерөнхий болон хэсэгчилсэн төлөвлөгөө, олгосон газрынхаа хэмжээнд тохируулж зураг төслөө захиалж байх; 

3.2. Норм дүрмийн зөрчилтэй, өөрийн орны байгаль цаг уурын нөхцөл болон техникийн шаардлага хангахгүй зургийг гадаадад захиалах, стандарт чанарын шаардлага хангахгүй хуучин барилгын материалыг барилга угсралтанд хэрэглэх, газар олголтоор шийдэгдсэн эдэлбэр газрын хил хязгаар болон шугам сүлжээний хүчин чадал хэтрүүлсэн, техник технологийн горимын зөрчилтэй, байгаль экологийн тэнцвэрт байдлыг алдагдуулсан засаж залруулах боломжгүй үл хөдлөх хөрөнгө барилга байгууламжийг захиалахыг зогсоох;

3.3. Захиалагч, хөрөнгө оруулагч нар мэргэжлийн зөвлөх үйлчилгээ эрхлэх аж ахуйн нэгж болон ажил үйлчилгээ эрхлэх тусгай зөвшөөрөл бүхий байгууллагуудаар барилга байгууламжийн зураг төсөл, барилга угсралтын ажил гүйцэтгүүлж, шаардлагатай тохиолдолд хяналт тавиулж, тэдний техникийн мэргэжлийн зөвлөгөөг дагаж, мөрдөж хэрэгжүүлж байх;

3.4. Тусгай хамгаалалтын бүс нутаг болон усны ай сав газарт амралт сувилал, зугаалгын зориулалттай газруудыг ихээхэн хэмжээгээр байршуулж эдгээр амралт сувилал, зугаалгын газруудын хүчин чадлаас хамааруулан бохир усны бага оврын био цэвэрлэх байгууламж төлөвлөдөг боловч ихэнх амралтын газрууд нь ашиглалтын шаардлага хангахгүй цооног барьж, байгаль орчныг бохирдуулж байгааг таслан зогсоож амралт сувилал, зугаалгын газруудын хүчин чадлаас үл хамааруулан био цэвэрлэх байгууламжийг төлөвлөж, барьж, байгаль экологид нөлөөлөхгүй арга хэмжээг авах.

Дөрөв. Аймгийн хот байгуулалт, барилга захиалагчийн албадын дарга нарт даалгах нь:

4.1. “Хот байгуулалтын тухай хууль”-ийн 10 дугаар зүйл, “Газрын тухай хууль”-ийн 51 болон 56 дугаар зүйл, “Орон сууцны тухай хууль”-ийн 9 дүгээр зүйл, “Хот суурины ус хангамж, ариутгах татуургын ашиглалтын тухай хууль”-ийн 12 дугаар зүйл, “Усны тухай хууль”-ийн 31 дүгээр зүйл, “Эрчим хүчний тухай хууль”-ийн 33 дугаар зүйлийн заалтуудтай зөрчилдсөн газар олголт бүхий барилгад ажил эхлэх, үргэлжлүүлэх зөвшөөрөл олгохгүй байсугай.

4.2. Энэхүү тушаалын хэрэгжилтэнд аймгийн Мэргэжлийн хяналтын газартай хамтран байнгын хяналт тавьж ажилласугай.

Тав. Тушаалын хэрэгжилтэнд хяналт шинжилгээ хийж дүнг энэ оны 10 дугаар сарын 20-ны дотор даргын зөвлөлийн хуралд танилцуулахыг Төвийн Барилгын чанар, аюулгүй байдлын газарт даалгасугай.