Улаанбаатар хотын орон сууц нийтийн аж ахуйн удирдах газрын 60 жилийн ойн баярын хурал улсын драмын эрдэмийн театрт болж өндөрлөлөө. Энэхүү арга хэмжээнд үе үеийн ахмад буурлууд, ажилчин албан хаагчид, яам тамгын газрын зочид төлөөлөгчид, хэвлэл мэдээллийн байгууллагууд хүрэлцэн иржээ.

Өнөөдөр тэдний хувьд 60 жилийн түүхийг хамтдаа бичилцсэн баярын өдөр. Ёстой л хийсэн зүйлтэй, хэлэх үгтэй энэ хамт олны хөдөлмөрийг төр засгаас үнэлж, олон ажилчидыг шагнаж урамшууллаа. Тэдний хувьд энэхүү баяр нь шагналын хур буулгасан өдрүүд байлаа. ОСНААУГазрын 60 жилийн ойн баярт нийслэлийн засаг дарга бөгөөд Улаанбаатар хотын захирагч Ц.Батбаяр, БХБЯ-ны сайд Ж.Наранцацралт,  ОСНААУГ-ын дарга Д. Мөнхцогт, Дулаан сүлжээ компанийн захирал н.Бямба-очир, Ус суваг удирдах газарын дарга н.Пүрэвжав зэргийн албаны хүмүүс ирж хүндэтгэл үзүүлсэн юм.

/Ахмад ажилтан Ц. Норов/
Танд баярын мэнд хүргэе. Амьдралынхаа хэдэн жилийг энэ компанитай холбосон бэ? Өнөөдөрийн баярын сэтгэгдлээ бидэнтэй хуваалцахгүй юу?

Баярлалаа. Өнөөдөр өвөөгийнх нь хувьд сэтгэл маш өндөр байна. Анх 19 настай учраа ч мэдэхгүй балчир залуу ирж байлаа. Одоо ахмад ажилчидийн тоонд орж байна. Миний амьдралын 38 жил энэ компанитай холбогдсон юм. Бидний хийж байгаа бүхий л ажил хүмүүсийн сайн сайхан амьдралын төлөө байдаг. Тийм учраас би өнөөдөр байгуулгаараа бахархаж байна.

Танд эрүүл энхийг хүсье. Сайхан баярлаарай.