Хяналт шалгалтанд хамрагдсан барилгын ажлын төсөв, гүйцэтгэлийг хянаж шалгах явцад ажлын нэр төрөл, тоо хэмжээг зураг төсөл, барилгын угсралтын ажлын технологийн дагуу тооцоогүй, үнэлгээний үндэслэл, хөдөлмөр зарцуулалт, материалын орцыг, тухайн хийгдэх ажлаасаа зөрүүтэй авсан, гүйцэтгэлд тооцсон ажлын нэр төрөл, тоо хэмжээ газар дээрээ хийгдсэн ажлаасаа зөрүүтэй, хийгээгүй ажлыг хийснээр, хийсэн ажлыг хийгээгүйгээр авсан зэрэг нийтлэг зөрчил илэрснээс гадна төсөв, гүйцэтгэлийг бодохдоо хүчингүй болсон хуучин нормоор тооцдог, захиалагч гүйцэтгэгч нар хяналтын төсөв, гүйцэтгэлийг ажлын зураг, хийгдсэн ажлын дагуу шалгаж баталгаажуулдаггүй байна.

Мөн барилга угсралт, засварын ажлын хяналтын төсвийг боловсруулахдаа гүйцэтгэх шаардлагатай ажилдаа биш батлагдсан хөрөнгөндөө тохируулан зохиодог, улсын экспертизээр баталгаажуулдаггүй, баталгаажуулсан нь бодит байдалтай нийцдэггүй, тендерт ирүүлсэн үнийн санал хяналтын төсөвтэйгээ ижилхэн байдаг зэрэг болно.

Дээр дурьдсан зөрчлүүд нь төсөв, гүйцэтгэлийг зохиож байгаа төсөвчин, инженер техникийн ажилтан, захиалагч нарын ажлын дадлага туршлага, мэдлэг чадвар, хувь хүний ёс зүйгээс шалтгаалан гарч байгаа бөгөөд энэ нь улсын төсөв хөрөнгийг үр ашиггүй зарцуулахад ихээхэн нөлөөлөхөд хүргэж байна.

Иймд холбогдох яам, газраас дараах асуудлуудыг анхаарч, арга хэмжээ авах шаардлагатай байна. Үүнд:

1.Шинээр гарсан төсвийн норм, дүрэм, заавар журам, тушаал шийдвэрийг хөдөө орон нутагт хурдан шуурхай хүргэх тогтолцоог буй болгож, түүнийг сурталчлах, семинар зохион байгуулдаг байх.

2.Төсөвчин болон инженер техникийн ажилтан, захиалагч, хөрөнгө оруулагч нарын ёс зүйн хариуцлагын тогтолцоог бий болгож, холбогдох журам дүрмэндээ тусган өгч хэрэгжүүлэх.

3. Төсөвчин бэлдэх, зэрэг олгох сургалтын программд зураг төсөл, барилгын технологи, ёс зүйн чиглэлийн хичээлийг тусгаж хэрэгжүүлэх.

4.Улсын төсөв хөрөнгийг, үр ашигтай, хяналттай зарцуулах үүднээс улсын төсөв болон Монгол улсыг хөгжүүлэх сангийн хөрөнгө оруулалтаар баригдаж засагдаж байгаа барилга байгууламжийн ажлын хяналтын төсвийг, төсөвт өртгийн хэмжээнээс хамаарахгүйгээр улсын экспертизээр заавал хянуулах талаар холбогдох заавар, журмандаа зааж өгөх.

Энэ талаар санал боловсруулж, Зам, тээвэр, барилга, хот байгуулалтын яаманд хүргүүлсэн болно.