Арван есөн аймгийн төвд 40 айлын орон сууц барьж байгаа. Өнгөрсөн есдүгээр сарын 15-ны байдлаар эдгээр барилгын 20-25 хувийг ашиглалтад оруулсан дүн гарчээ. Харин сум, суурин газарт барьж буй дөрөв, найман айлын орон сууцны 35 хувийг ашиглалтад өгөөд байгаа аж. Улсын дундаж үзүүлэлт ийм болохоос ажил урагштай байгаа, сайн ажиллаж буй аймаг цөөнгүй. Өвөрхангай аймгийн төвд барьж буй орон сууцны барилгын 60, Сэлэнгэд 70 хувийг гүйцэтгээд байна. Эдгээр аймгийн төрийн албан хаагч, бага, дунд орлоготой иргэд шинэ оноос өмнө орон сууцтай болох байх гэсэн чихэнд чимэгтэй мэдээг Орон сууцны санхүүжилтийн корпорацийнхан дуулгав. Дархан-Уул, Дундговь, Завхан, Орхон аймагт барилгын ажил гайгүй байгаа бол Булган, Төв, Ховд, Увс аймгийнхан дөнгөж эхэлж байгаа гэнэ.

Улсын хэмжээнд 89 суманд 119 орон сууц барихаар төлөвлөснөөс дөрвөн сумын зургаан орон сууцнаас бусдыг нь барьж эхэлжээ. Дорнод, Говь-Алтай аймагт дөрөв, найман айлын орон сууц бариад дуусч байгаа аж. Зарим аймагт гадаад, дотоодын санхүүжилтээр боссон орон сууцыг ч "40 мянган орон сууц" хөтөлбөрийн хүрээнд барилаа хэмээн шоудсан тохиолдол цөөнгүй. Энэ талаар "Засгийн газрын энэ хөтөлбөрийн нэрийг барих тохиолдол гарч байгаа. Үүнийг иргэд ялгаж салгаж ойлгоосой" гэж Орон сууцны санхүүжилтийн корпорацийнхан ярилаа.

Улаанбаатарын орон сууцны талбайн хэмжээг томруулна

Төрийн албан хаагч, бага, дунд орлоготой өрхийг орон сууцжуулах хөтөлбөрийн хүрээнд Улаанбаатар хотод барих орон сууцны зургийг шинэчилж эхэлжээ. Зураг төслөө буруу гаргачихаж гэж Та эндүүрч магад. Орон сууцны талбайн хэмжээг томруулах шаардлага гарсан тул зураг төслийг дахин боловсруулж байгаа аж. Хуучин зураг төслийг 2005-2006 оны судалгаанд тулгуурлан хийжээ.

Тухайн үед иргэдийн амьжиргааны түвшин одоогийнхоос доогуур, үл хөдлөх хөрөнгө худалдан авах чадвар бага байсан тул түүнд тохируулан орон сууцны өрөөнүүдийн талбайг багаар тооцсон байж. Харин одоо цаг өөр болсон. Орон сууц худалдан авах гэсэн хүн ч олширч эрэлт хэрэгцээ нэмэгдсэн. Хүмүүс зай томтой, хоёроос дээш өрөөтэй байр сонирходог. "40 мянган орон сууц" хөтөлбөрт хамрагдахаар хүсэлт гаргаж буй иргэд ч том, саруул байранд амьдрахыг хүсч байгаагаа илэрхийлсэн тул эрэлтээ дагадаг нийлүүлэлтийн хуулийг дагахаас өөр аргагүй болсон гэнэ.