ЗТБХБ-ын сайд Х.Баттулга амралтын өдрөөр салбараа нэг нэгээр нь сонгон авч ажил байдалтай нь танилцаж, санаа бодлыг нь сонсдог уламжлалтай болоод байгаа. Энэ удаад тэрээр 80 жилийн түүхтэй авто замын салбарын төрийн бус байгууллага болон, компани аж ахуйн нэгжүүдийн төлөөлөл 50 гаруй хүнтэй уулзлаа.

Уулзалтын эхэнд сайд “Ажлын өдрүүдэд та нартай уулзаад тухтай ярилцах боломж гарахгүй юм. Тэгээд өнөөдөр уулзаж байна. Бүгдээрээ ажил хэрэгч хүмүүс байгаа байх. Шууд ажлынхаа тухай ярианд оръё. Аливаа улс орны хөгжил авто замаасаа харагддаг. Манай улсад 16000 орчим км зам байгаагаас 2000 гаруй нь хатуу хучилттай. Үүний 420-430 км нь Улаанбаатарт байдаг. Дэлхийн стандарттай манайх замаа харьцуулвал ихэвчлэн гуравдугаар зэргийн зам л байдаг юм байна” гэж хэлэв.

Замын салбарын ахмадын хорооны тэргүүн Б.Лувсан “Яам гүйцэтгэгч хоёрын хооронд гэрээ хийдэг ч хариуцлага тооцох зарчим байхгүйгээс замчид их хохирч байна. Захиалагч тал санхүүжилтийг нь өгдөггүй, тэглээ гээд хэн ч хариуцлага хүлээдэггүй. Мөн яам аж ахуйн байгууллагуудаа салгаж агентлагт өгөөд, зөвхөн бодлогоо барьвал яасан юм бэ гэсэн саналтай байна” гэв.

Инженерүүдийн нийгэмлэгийн дарга Л.Гомбо “Манай холбоонд бүртгэлтэй 600-гаад инженерийн 300-гаад нь мэргэжлийн ажлаа хийдэг. Авто замын салбар сүүлийн үед олоэн улсын төвшинд дөхөж байгаа. Гэхдээ мастер төлөвлөгөөг батлуулах нь чухал байна. Авто замын сүлжээг өргөтгөх 1994 оны мастер төлөвлөгөөний биелэлт 70-80 хувьтай байгаа. 2008-2021 онд хэрэгжүүлэх хоёр дахь мастер төлөвлөгөө хийсэн байгаа. Түүнийг шууд хэрэгжүүлээд явах боломжгүй байна. Батлуулаагүй төлөвлөгөө хэрэгжүүлэх нь зохимжгүй учраас яаралтай батлуулахад анхаарна уу. Мөн манай салбарын эрдэм шинжилгээ судалгааны ажил хоцрогдож байгаа. Замын чанарыг сайжруулах нэг гол хөшүүрэг нь хяналт шалгалт. Тэгэхээр зөвлөх инженерийн хяналт гэж бий болгомоор байна” гэлээ. Уулзалтад оролцогчид, “Зам бариулах ажлыг яам захиалаад компани гүйцэтгэж, мэргэжлийн хяналтынхан хүлээн авдаг тогтолцоо биш байна. Захиалагч нь хүлээж авдаг байх хэрэгтэй” гэж ярьцгааж байв.

Харин замчдын үйлдвэрчний эвлэлийн холбооны төлөөлөгч “Барилга, тээврийн салбарынхнаас замчдын цалин хөлс бага. Хөдөлмөр хамгааллын аюулгүй байдалд анхаардаггүй” гэж шүүмжиллээ. Харин инженерүүдийн нийгэмлэгийн гишүүн Г.Баасанхүү “Улаанбаатар хотын замыг өргөтгөх ямар ч боломжгүй, нөхөөс тавиад ч нэмэргүй, нөхөөс авахаа больсон. Гэхдээ үүнийг бүгдийг нь шинэчлэх боломж бий. Үүнд 2-3 сая ам.доллар зарцуулагдах байх” гэлээ.

Уулзалтын төгсгөлд сайд “Гардаж юмаа хийдэг хүмүүстэй уулзаж, салбарын өнөөгийн нөхцөл ямар байгааг мэдэж авах гэсэн юм. Уулзалтын үр дүнд ажлын ахиц гарна. Хамтарсан Засгийн газрын үед гадаадаас хөрөнгө оруулалт оруулж ирэхийн тулд хаана, хэдий хэмжээний ямар зам хэрэгтэй байгааг эхлээд төлөлвлөх хэрэгтэй. Импортоор бараа бүтээгдэхүүн оруулж ирээд тодорхой хугацаанд үнэ тогтворжуулж барих ямар ч боломжгүй юм. Тийм учраас бүтээн байгуулалтынхаа нэлээд хэсгийг дотооддоо үйлдвэрлэдэг байх хэрэгтэй. Тийм ч учраас цементийн томоохон үйлдвэр байгуулах санаатай байна.

Авто замын салбар түүхт 80 жилийнхээ ойтой золгож байгаа, гэхдээ энэ түүхэн цаг хугацаатай нь харьцуулахад хийж бүтээсэн нь гээд хэлэх нэг их овойж оцойхоор юм алга байна. Ядаж ганц хурдны зам байхгүй л байна. Шинэ Засгийн газрын хөтөлбөрт Замын-Үүд-Алтанбулагийн чиглэлд хурдны зам барих төлөвлөгөө байгаа. Энэ хурдны замыг барих техник эдийн засгийн үндэслэлийг хийлгэчихсэн. Ирэх жилээс энэ 920 км хурдны замын ажил бараг эхэлчих байх. Үүнийг хэрэгжүүлэхэд замын салбарынхан л хүчин зүтгэх учиртай” гэв.