“Төгрөг нуурын энержи” компанийнхан утаагүй түлшний үйлдвэрийнхээ шавыг тавилаа. Тус компани ОХУ-ын “Сибтермо” компаниас худалдан авч буй термококс технологиор утаагүй түлш үйлдвэрлэх юм. Төв аймгийн Баян сумын нутагт орших Төгрөг нуурын хүрэн нүүрсний ордоо түшиглэн уг үйлдвэрийг байгуулна. Үйлдвэрийнхээ нэг хэсгийг нүүрсний уурхайнхаа ойролцоо байгуулахаар болжээ.

Брикетэн түлшний энэ үйлдвэр 30 газификатортой байх юм. Үүний гурвыг ОХУ-аас ачуулахад бэлэн болжээ. Уг тоног төхөөрөмжийг гаалиар оруулахад татварын хөнгөлөлт үзүүлэх болов уу хэмээн найдаж буйгаа тус компанийнхан ярилаа. Эдгээр газификаторыг уурхайнхаа дэргэд суурилуулна. Бусдыг нь Хонхорт суурилуулж, Улаанбаатар хотын хэрэглэгчдийг брикетэн түлшээр хангаж, нийслэлийг утаанаас салгахад хувь нэмрээ оруулахаар төлөвлөжээ.

Шавь тавих ёслолын үеэр тус үйлдвэрийн хөрөнгө оруулагч Денис Лим “Энэ төсөл их ирээдүйтэй. Утаагүй түлшний үйлдвэр Улаанбаатарт төдийгүй Монгол Улсад маш хэрэгтэй” гэж байлаа.

Утаагүй түлш гэхээр утаа гарахгүй л бол болно гэж ойлгодог цаг ард өнгөрчээ. Зах зээл дээр худалдаж буй брикетэн түлшний чанар муу, амархан үйрч бутардаг, шатаж байгаа мэт улайссан хэрнээ илчгүй хэмээн хэрэглэгчид шүүмжилдэг. Үүний улмаас брикетэн түлшний борлуулалт муудаж, хүмүүс нүүрс түлэхийг илүүд үзэх болсон.

Гэр хороололд хэрэглэх брикетэн түлшний илчлэг доод тал нь 4500 ккал байх ёстой ч одоо гадуур борлуулж буй ийм түлшний дийлэнх нь 3000 ккал хүрэхтэй үгүйтэй илчлэгтэй аж. Шаврыг хэмжээнээс хэтрүүлж хольсон, муу нүүрс хэрэглэснээс брикет чанаргүй болдог байна.

Тэгвэл “Төгрөг нуурын энержи” компани хэрэглэгчдэд чанартай, илчлэг сайтай брикетэн түлш нийлүүлэхээ амлаж байна. Энэ талаар тус компанийн гүйцэтгэх захирал Л.Дүгэржав “Бидний үйлдвэрлэх брикет Налайхын нүүрснээс дутахгүй илчлэгтэй байх болно. Туршилт хийхэд дунджаар 5500-6000 ккал илчлэгтэй байх тооцоо гарч байгаа” гэв. Амархан үйрч бутрахгүй учраас шатсаны дараа үлдсэн шаврыг нь барилгын дүүргэгч материал болгон ашиглах боломжтой гэсэн.

TODAY