Улаанбаатар хотод 450 гаруй угсармал орон сууцны барилга байдаг. Эдгээр угсармал барилгууд нь дулаан тусгаарлалт муутай баригдсан төдийгүй барилгын шугам сүлжээ хуучирч элэгдэлд  орсон байна. Хэдийгээр орон сууц Улаанбаатар хотод жил ирэх тусам сүндэрлэн боссоор байгаа ч иргэд маань амьдралын боломж нөхцөлөөс шалтгаалж тэр болгон шинэ байранд орж чаддаггүй. Мөн заавал шинэ юм гэлгүй өөрсдийн орон сууцаа өөд татах боломж та бидэнд олдож байна.

Тэгвэл Германы техникийн хамтын ажиллагааны нийгэмлэгийн “Угсармал орон сууцны барилгыг дулааны үр ашигтай болгон засварлах төсөл”-ийн хүрээнд Нийслэлийн Чингэлтэй дүүрэг, 6-р хороолол, 5-р хорооны 8-р байрыг  засварлан хүлээлгэж өглөө. Энэхүү таван давхар барилга нь 1400 м² талбай эзлэдэг бөгөөд анх 1982 онд ашиглалтанд оржээ. Нийтдээ 25-н жилийн нүүрийг үзсэн уг барилгын цонхнууд нь завсар зай ихтэй, хаалттай байхдаа хэт их агаар сэлгэлт үүсгэдэг, цахилгаан шугам сүлжээ, холболт нь орчин үеийн шаардлагад нийцэхээ больсон, хавтангуудын уулзвар хэсэг заадсаар дулаан их алддаг  гээд хүндрэлтэй асуудал нилээд байжээ.

Харин энэ бүх асуудлыг ГТХАН, Нийслэлийн засаг даргын тамгын газар, “Аква Пласт Монгол” ХХК, ”BBL” ХХК, “ГИКОН” ХХК, “Баясах Трейд” ХХК, “Мон Хорус Интернэшнл” ХХК гэх зэрэг хувийн хэвшлийн байгууллагуудтай хамтран гүйцэтгэсэн байна. 250 сая төгрөгийн хөрөнгөөр сэргээн засварлагдсан уг барилгыг өчигдөр буюу 10-р сарын 19-ны өдөр хүлээлгэж өглөө. Барилгын нээлтийн ажиллагаанд Барилга, Хот байгуулалтын сайд Ж.Наранцацралт, Герман улсаас Монгол улсад суугаа бүрэн эрхт элчин сайд ноён доктор Кивер Фишер, Нийслэлийн засаг даргын тамгын газрын ерөнхий менежер Амгаланбаяр, ГТХАН-ийн Монгол дах суурин төлөөлөгч ноён Маршке, мөн ГТХАН-ийн хөтөлбөрийн захирал Ruth Erlbeck, МСӨХ-ны дээд зөвлөлийн ерөнхийлөгч Жигжид, холбогдох албаны хүмүүс болоод иргэд, хэвлэл мэдээллийхэн оролцлоо.

Нээлтийн ёслолын үеэр БХБЯ-ны сайд Наранцацралтаас барилгын талаар нэмж тодрууллаа.

Яамны зүгээс энэ ажилд ямар оролцоотойгоор ажиллав. Цаашдаа энэ чиглэлээр ямар арга хэмжээ авна гэж бодож байна вэ?
“Монгол улсад нийтдээ 720 гаруй угсармал орон сууцны барилга байдаг. Энэ бүгдийг дулаалах, техник шинэчлэл хийх цаг нь болсон. Тийм ч учраас энэ талын арга хэмжээг авах бодлогыг манай яамны зүгээс төлөвлөж байгаа. Өнөөдөр нэг барилга, орон сууцны дулаалга, техникийн шинэчлэл хийгдлээ. Энэхүү арга хэмжээг цаашид үргэлжлүүлэн хийх мастер төлөвлөгөөг  боловсруулж, хотын захиргаа, олон улсын байгууллагаас хөрөнгийг нь гаргах замаар одоогийн бүх орон сууцны дулаалгыг хийхээр төлөвлөөд байна. Тийм ч учраас энэ төсөлд анхаарлаа хандуулж байгаа” гэлээ.

Энэ орон сууцны оршин суугчид өвлийн тэсгэм хүйтэнд даарна гэж айлгүй сэтгэл амар өвөлжих боллоо. Улаанбаатарт угсармал орон сууцны барилгуудыг загвар төсөлтэй ижил байдлаар дулаалсан тохиолдолд жилд дулааны эрчим хүчийг 70% хүртэл хэмнэх  боломж бүрдэнэ гэж  төслийхөн нээлтийн үеэр хэлж байсан юм.

Д.Нарантуяа
БАРИЛГА.мн