Нийслэлийн хөдөлмөрийн бирж нээлттэй хаалганы өдөрлөг зохион байгууллаа. Аж ахуйн нэгж байгууллага, ажил олгогчдоос тус биржид ирүүлсэн ажлын байрны захиалгыг танилцуулж, иргэдийг ажилд зуучлах, хөдөлмөрийн зах зээлийн мэдээлэл зөвлөгөө өгөх зорилготой энэ өдөрлөгт “Сандей” компани, “Үндэсний бууз” зоогийн газар, “Танан импэкс” зэрэг ажил олгогчид ажлын байранд захиалга авлаа.

Мөн “Лемүр”, “Гранд перфект” зэрэг сургалтын төв үйл ажиллагаагаа сурталчлав. Ажил хайж буй хүмүүс, оюутнууд их ирж байсан. Нийслэлийн хөдөлмөрийн биржид 130 гаруй албан газрын 800-гаад ажлын байрны захиалга иржээ. Барилгын ажлын захиалга олон байгаа аж. Ажил хайж байгаа болон хөдөлмөрийн биржид нэрээ байршуулах хүн 1896 дугаарын лавлах утсанд хандаж болох нь.

Тус биржээр зуучлуулан өнгөрсөн онд 1650 хүн ажилд орсон бол энэ оны арваннэгэн сарын байдлаар 3750 хүн ажилтай болоод байна. “Бид иргэдийн хүсэлтийн дагуу байнгын болон түр ажилд зуучилдаг. Он гарсаар 136 хүнийг түр ажлын байраар хангасан” гэж Нийслэлийн хөдөлмөрийн биржийн мэргэжилтэн Ч.Жаргалан ярилаа.

Оюутнуудыг ажилд зуучлах чиглэлээр хэрхэн ажилладгийг нь сонирхоход, Бид оюутнуудыг ажилд зуучлах “Цагийн ажил” хөтөлбөр хэрэгжүүлж байгаа. Өдөрт 5-8 цагийн түр хугацааны ажлын байр гардаг. Тийм ажлыг голдуу оюутнуудад санал болгож байна. Манай биржид 300 гаруй оюутан бүртгүүлсэн. Өнөөдөр л гэхэд 20 оюутныг сурталчилгааны ажилд явуулах гэж байна” гэлээ.