"Мишээл-экспо" төвд 3 сарын 14-ний өдөр нээгдсэн "Барилга, орон сууц экспо-2008" үзэсгэлэн яармагийн үеэр хүмүүсийн хамгийн их сонирхол татаж байсан зүйл нь эко шийдэлтэй хувийн орон сууц байв. Энэ сууцыг зочны өрөө гал тогоотой нь хамт төлөвлөж, унтлагын, ариун цэврийн өрөө, үүдний хэсэг гэсэн зохион байгуулалтай юм. Сууцны талаар “Эн-Ти-Ай-Си констракшн” ХХК-ийн захирал Н. Ганбаатартай ярилцлаа.

-Танай байшинг хүмүүс их сонирхож байна. Энэ хаанахын технологи вэ? Өвөл зунгүй суух боломжтой юм уу?
-Энэ сууц Монгол инженерийн ур ухаанаар бүтсэн. Бид байгаль орчинд хоргүй, найдвартай бат бөх, тохилог, боломжийн үнээр олон иргэдийг хувийн сууцтай болгохыг зорьж байна. Өөрийн эзэмшил газартаа барилга барих хүмүүсийн цаг завыг хэмнэх давуу талтай . Нэг ёсондоо бэлэн бүтээгдэхүүн дэлгүүрээс худалдан авч байгаатай адил гэсэн үг. Энэ байшин 6.6 метр урт, зургаан метр өргөн, зөөж, тээвэрлэхэд хялбар хоёр хэсэг салах боломжтой. Нэг үгээр, нүүдэл суудал хийхэд зориулсан гэхүү дээ. Өвөл, зунгүй суух боломжтой. Энэ манай компанийн барьсан анхны хувийн сууц. Урьд нь бид манаачийн байр барьж байсан.

-Манайхан бол тоосго, блокоор барилга барьдаг шүү дээ. Харин та бүхний бүтээсэн энэ сууц төмөр хавтанг зангидаж угсарсан байх юм. Хүмүүст хэврэг байх болов уу гэсэн болгоомжлол төрүүлэхүйц юм?
- Төмөр каркасан хийцтэй тул бат бөхийн хувьд санаа зовох хэрэггүй. Газар хөдлөлтөд хамгийн тэсвэртэй байх болно. Бид энэ байшинг бариулж байгаа хүмүүст таван жилийн баталгаа гаргаж өгч байгаа. Үндсэн каркасыг төмөр эдлэхүүнээр зангидаж, угсарсан. 10 см сайн чанарын сэндвичэн хавтангаар бүрж, дотор талаас нь эрдэс чулуун хөвөнгөөр давхар дулаалж, гипсэн хавтангаар доторлосон. Мөн барилгын дээврийг сэндвичэн хавтангаар бүрж, хуйлмал шилэн хөвөнгөөр дулаалан, таазны каркасийг хөнгөн цагаанаар хийсэн байгаа. Харин шалыг төмөр болон модон дам нуруугаар хийцэлж 2.5 см банзаар уллаж, эрдэс шилэн хөвөнгөөр дулаалан хучилтыг таван сантметрийн банзаар шалласан.

-Ингэхэд дулааны асуудлыг хэрхэн шийдсэн бэ?
-Халаалтыг байгаль экологид хоргүй, оршин суугчдын тав тухыг бодолцож шалны "Hi-Tekh" ялтсан цахилгаан халаагуур суурилуулсан. Халаалтын тухайд бид хоёр жилийн баталгаа өгч байгаа.Бие даасан цэвэр, бохир усны системтэй, иж бүрэн холболт, тоноглол хийсэн. Ариун цэврийн өрөөнд усны цахилгаан шахуурга төлөвлөж агшин зуур халаагч суурилуулсан байгаа.

-Танайд захиалга өгөхөд хэдий хэр хугацаанд сууцтай болох вэ? Ямар үнээр борлуулж байна?
-Захиалагч байшингийнхаа суурийг бэлэн болгочихвол нэг өдрийн дотор л сууц босно. 15900 ам. доллараар борлуулж байна. Сууцны үнийн 30 хувийг төлсөн тохиолдолд банкны урт хугацааны зээлээр худалдан авах боломжтой.

-Дээрх загвараас гадна өөр шийдлээр сууц барих уу?
-Одоохондоо энэ загвараар барина. Цаашид 4-5 янзаар хоёр давхар сууц барих төлөвлөгөөтэй байгаа.