Дарханчууд та бүхэнд манай вэб сайт баяртай мэдээллийг хүргэж байна. Монгол улсын засгийн газрын “40 мянган айлын орон сууц “ хөтөлбөр , Дархан хотын ерөнхий төлөвлөгөө, 13-р хорооллын хэсэгчилсэн төлөвлөгөөг үндэс болгон Дархан хотод орон сууцны 13-р хорооллыг барьж ашиглалтанд оруулах гэрээ өнөөдөр БХБЯ-дээр боллоо. Гэрээнд гарын үсэг зурхаар БХБЯ-ны төрийн нарийн бичгийн дарга Ц.Ганхүү, Дархан–Уул аймгийн засаг дарга Д.Хаянхярваа, “Дархан шар бүрд” ХХК-ны захирал О.Энхжаргал нар оролцлоо. Дархан-Уул аймгийн Засаг даргын 2006 оны 10-р сарын 5-ны 315-р захирамжийн дагуу олгогдсон газар орон сууцны хорооллыг барих ажлыг “Дархан шар бүрд” ХХК хийж гүйцэтгэх бөгөөд 2007-2012 он хүртлэх хугацаанд өөрийн хөрөнгөөр чанарын өндөр түвшинд барихаа тэд танд амлаж байна.

Гэрээний дагуу БХБЯ-аас уг барилгын инженерийн шугам сүлжээний ажлыг улсын төсвийн хөрөнгөөр хийж гүйцэтгэх, барилгын чанар, үйл ажиллагаанд хяналт тавих, хууль эрх зүйн хувьд дэмжлэг үзүүлэхээр боллоо. Шинээр баригдах орон сууцны 2хувьтай тэнцэх сууцыг дайнд оролцож байсан ахмад дайчидад, 20 хувийг төрийн албан хаагчидад, бага дунд орлоготой иргэдийг  орон сууцжуулах хөтөлбөрийг хэрэгжүүлэхэд зориулахаар санал нэгдэж байгаагаа гэрээнд гарын үсэг зурах үедээ дурдаж байсан юм.