Тендерийн шалгаруулалтад та итгэдэг үү. Өнгөрсөн хугацаанд зохион байгуулсан тендерийн хэчнээн нь шударга бус, танил талаар “урсаж”, авлигын гинжин хэлхээ үүсгэсэн болохыг олон нийт гадарлана. Түүний хэд нь төрийг хуурч, төсвийн хөрөнгөөр наадсан бол. Тендер гэсэн нэрийн дор татвар төлөгчийн мөнгө хэн нэгний бизнесийг дэмжсэн хөрөнгө оруулалт болон хувираа бол гэсэн хар хэн бүхэнд байж ирсэн. Тиймээс шударга тендер, төсвийн үр ашигтай зарцуулалтыг шаардах нь иргэн бүрийн эрх бас үүрэг юм.Төрийн зүгээс ч тендерийн шалгаруулалт, гүйцэтгэлд хяналт тавих, хариуцлага тооцох, шударга тогтолцоог бүрдүүлэхээр зорьж байна. Үүнийг хэрэгжүүлэгч нь Худалдан авах ажиллагааны газар. Тус газраас “Цахим худалдан авалт” нээлттэй өдөрлөгийг өчигдөр зохион байгууллаа.

Худалдан авах ажиллагааг цахим хэлбэрээр зохион байгуулах бэлтгэл ажлын хүрээнд цахим худалдан авах ажиллагааны MEPS системийг танилцуулах, системийг ашиглан худалдан авах ажиллагаанд хэрхэн оролцох сургалт, зөвлөгөөг нээлттэй өдөрлөгийн үеэр танилцуулсан юм. Өдөрлөгт төрийн болон орон нутгийн өмчийн хөрөнгөөр бараа, ажил, үйлчилгээ нийлүүлэх, гүйцэтгэх хүсэлтэй аж ахуйн нэгжийн төлөөлөл оролцлоо. Мөн Монголын барилгачдын холбоо, Замчдын холбооны гишүүний байгууллагын төлөөлөл ч ирсэн байв. Худалдан авах ажиллагааны газраас 2013 онд хэрэгжүүлэх улсын болон бүс нутгийн чанартай төсөл арга хэмжээний жагсаалтыг танилцуулж, цахим худалдан авах ажиллагааны хууль эрх зүйн орчны талаар хэлэлцүүлэг өрнүүллээ. Энэ үеэр “тендерийн ченж”-ийн талаар оролцогчид хөндөж байв. Төрийн болон орон нутгийн тендерт шалгарч, түүнийгээ туслан гүйцэтгэгч нэрээр компаниудад зарах тохиолдол цөөнгүй байдаг аж. Тиймээс цахим тендерийг нэвтрүүлснээр “тендерийн ченж” гэх ойлголт үгүй болно гэж салбарынхан онцолж байна. Худалдан авах ажиллагаа  нь өмнө бичиг цаасанд хэт суурилсан, гар ажиллагаатай, давхардсан бүртгэл мэдээлэл ихтэй. Мөн үр ашиг бага, ил тод бус гэсэн шүүмжлэлийг иргэдийн зүгээс өгдөг. Тэгвэл дээрх асуудлыг цахим тендер хэлбэрээр шийдэх гэж байгаа нь олзуурхууштай.

Монгол Улсын 2013 оны төсвийн тухай хуулиар яам, агентлаг, байгууллагын өөрийн хэрэгцээнд худалдан авах 101 төсөл арга хэмжээг баталжээ. Монгол Улсын Сангийн яам, БНСУ-ын Олон улсын хамтын ажиллагааны KOIKA агентлагтай хамтран 2011-2012 онд “Монгол Улсад цахим худалдан авах ажиллагааг нэвтрүүлэх” төслийн нэгдүгээр үе шатыг хэрэгжүүлжээ. Өнөөдрийн байдлаар нийт найман тендерийг цахим хэлбэрээр зохион байгуулаад байна. Мөн “Монгол Улсад цахим худалдан авах ажиллагааг нэвтрүүлэх” төслийн хоёрдугаар үе шатыг хэрэгжүүлэх төслийн саналыг боловсруулж БНСУ-ын Олон улсын хамтын ажиллагааны агентлагийн 2014 онд хэрэгжүүлэх төсөл хөтөлбөрт тусгуулахаар Эдийн засгийн хөгжлийн яаманд хүргүүлжээ.

Цахим худалдан авах ажиллагааны систем /MEPS/-ийн хүрээнд цахим тендерийг зохион байгуулахаас гадна цахим дэлгүүрийг ирэх оноос ажиллуулах гэж байна. Засгийн газрын худалдан авах ажиллагааг олон нийтэд нээлттэй, өрсөлдөх тэгш боломжтой, үр ашигтай, шударга, хариуцлагатай, ил тод болгох, худалдан авах ажиллагааны шалгаруулалтыг зохион байгуулах зардлыг багасгах эерэг үр дүн гарах аж. Мөн төрийн байгууллагын үйл ажиллагаа, уялдаа холбоог сайжруулах, улсын төсвийг үр ашигтайгаар зарцуулах, хэмнэх үүдийг нээж байгааг онцлон тэмдэглэе. Худалдан авах ажиллагааг 2016 он гэхэд 100 хуюь цахим хэлбэрээр явуулах зорилт бий. Энэ талаар холбогдох албаны хүмүүсийн үгийг хүргэе.

Д.Энхжаргал: Нийт тендерийн 20-35 хувийг цахим хэлбэрээр зохион байгуулна

/Засгийн газрын хэрэгжүүлэгч агентлаг Худалдан авах ажиллагааны газрын дарга/

-Монгол Улсын Шинэчлэлийн Засгийн газрын 2012-2016 оны үйл ажиллагааны хөтөлбөрийг хэрэгжүүлэх арга хэмжээний төлөвлөгөөнд тендерийн будлиан, авлига, хээл хахуулийг халах зорилгоор төсвийн хөрөнгөөр бараа, ажил, үйлчилгээ худалдан авах үйл ажиллагааг 100 хувийн цахим хэлбэрт шилжүүлэхээр тусгасан. Энэхүү зорилтын хүрээнд манайхаас 2013 онд зарлах нийт тендерийн 20-35 хувийг цахим худалдан авалтын хэлбэрээр зохион байгуулна. Цахим тендер нь цаас, цаг хугацааг хэмнэх, ажлыг хөнгөвчлөх ач тустай.

С.Дашдондог: Худалдан авах ажиллагааг олон улсын жишигт нийцүүлнэ

/Худалдан авах ажиллагааны газрын дэд дарга/

-Засгийн газрын зүгээс төрийн болон орон нутгийн өмчийн хөрөнгөөр бараа, ажил, үйлчилгээ худалдан авах ажиллагааг нээлттэй, ил тод, шударга, шуурхай, олон нийтэд хүртээлтэй байдлаар зохион байгуулж, олон улсын жишигт нийцүүлэх талаар байнга анхаарч, өмнөө тавих тэргүүлэх зорилтын нэг болгон ажиллаж байна. Монгол Улсын төсвийн хөрөнгөөр 2013 онд шинээр зохион байгуулж хэрэгжүүлэх 789 хөрөнгө оруулалтын төсөл, арга хэмжээ бий. Үүнээс 399-ыг нь Худалдан авах ажиллагааны газар хэрэгжүүлнэ. Үлдсэн 390 төсөл арга хэмжээг бусад байгууллагууд хэрэгжүүлэхээр болсон. Үүнд, өөрийн хэрэгцээнд 101, их засвар 33, орон нутагт хэрэгжүүлэх 243, төрийн нууцад хамаарах 13 төсөл арга хэмжээ орж байна. Худалдан авах ажиллагааны газраас ирэх онд улсын хэмжээнд зохион байгуулах 399 төсөл арга хэмжээний 76 нь бараа, 252 нь ажил, 71 нь үйлчилгээ буюу зөвлөх ажил байна.

Б.Баяртогтох