Өчигдөр буюу есдүгээр сарын 3-ны өдөр III эмнэлгийн өмнө баригдаж буй барилга дээр осол гарч хүнд машин механизм унасны улмаас 12 настай охин амиа алдсан харамсалтай хэрэг гарсан билээ.

Осол болсон барилгын газрыг иргэн н.Батболд 2012 оны нэгдүгээр сард Баянгол дүүргийн 5-р хороонд эмнэлэг орон сууц барих зориулалтаар газар эзэмших эрхийн гэрчилгээ авсан байна.

Гэвч энэ газарт “Тоёхиро Студио” хэмээх компани барилгын зураг гаргаж, Улаанбаатар хотын захиргаанд уламжилсан боловч зураг төслийг мэргэжлийн комисс батлаагүй, барилга барих засаг даргын захирамж гараагүй мөн Улаанбаатар хотын ерөнхий архитектор батлаагүй юм байна. Тиймээс Нийслэлийн Мэргэжлийн хяналтын газар энэ барилгын ажлыг эхлүүлэх зөвшөөрлийг олгоогүй тул барилгыг хууль бусаар барьж эхэлсэн ажээ. Барилгын гүйцэтгэгчээр нь “Төгсбүрэн” ХХК  ажиллаж байсан аж.

Нийслэлийн Мэргэжлийн хяналтын газар энэ хавар тус барилгын гурван давхар баригдаж байх үед ажлыг зогсоох тухай мэдэгдэх хуудас явуулсан боловч тус гүйцэтгэгч компани мэдэгдлийг огт тоогоогүй байна. Ингээд 13 давхар барилгын долоон давхрыг барьж байх үед өчигдрийн осол болсон ажээ.

Уг барилгын ажлыг гүйцэтгэж байх хугацаанд тус компани техникийн болон хөдөлмөрийн аюулгүй байдлыг ноцтой зөрчсөн байна.

Өчигдөр осол гаргасан механизмыг албан ёсоор техникийн үзлэгт оруулаагүй, ажиллуулах зөвшөөрөлгүй байсан ажээ.

Иймээс хотын удирдлага Мэргэжлийн хяналтын байгууллагын удирдлагуудтай зөвшилцөөд дараах үүрэг даалгавруудыг өгсөн байна:

1. Улаанбаатар хотод барилга барих эсвэл газар эзэмших зөвшөөрөлгүй эхэлсэн 60 гаруй байгууламжийн байдаг байна. Тиймээс хотын удирдлага тэдгээр барилгын ажлыг өнөөдрөөс эхлэн бүрмөсөн зогсоох шийдвэрийг Нийслэлийн Мэргэжлийн хяналтын газар болон Нийслэлийн Цагдаагийн газарт үүрэгджээ.

2. Зөвшөөрөлгүй баригдаж байгаа болон баригдсан барилгуудыг цахилгаан дулаан, цэвэр усаар хангахгүй байхын хангагч байгууллагуудад үүрэг болгон өгөхөөр шийдвэрлэсэн байна.

3. Барилгын ажил хийж байгаа компаниуд болон хувь хүмүүсийн эзэмшилд ашиглагдаж байгаа бүх машин механизмуудад энэ есдүгээр сард багтаан үзлэг хийж гэрчилгээжүүлэх ажлыг хийж дуусгахыг НМХГ-т үүрэг болгож байгаа юм байна.

А.Цацрал