Засгийн газраас хэрэгжүүлж буй "40 мянган айлын орон сууц" хөтөлбөр хүрээнд гэр хорооллыг дахин төлөвлөх замаар орон сууцжуулах анхны ажил эхэллээ. Өмнө нь орон сууцыг шинэ газар дээр буюу ашиглаж байгаагүй газар, эсвэл барилга хоорондын зайд барьж байсан бол энэ удаад хэдхэн хоногийн өмнө гэр хороолол байсан газарт нэг жилийн дараа 10 мянган айлын орон сууц сүндэрлэх  нь.
        Энэ нь зөвхөн Засгийн газраас хэрэгжүүлж байгаа "40 мянган айлын орон сууц" хөтөлбөрөөс гадна Улаанбаатар хотын агаарын бохирдлыг бууруулах тухай УИХ-ын шийдвэрийн хүрээнд хэрэгжиж байгаа ажил юм. Ийнхүү шаваа тавьсан 14 дүгээр хороолол нь Нарантуул худалдааны төвийн араас Офицеруудын ордон хүртэл үргэлжлэх бөгөөд уг ажлыг Монгол Тайванийн хамтарсан "К&Т" компани гүйцэтгэх аж.
        НИТХ-ын 84 дүгээр тогтоолоор батлагдсан уг тосөл бүрэн хэрэгжсэнээр нийт 235 га талбайд 10700 орон сууц, хоёр сургууль, таван   цэцэрлэг,  өрхийн найман эмнэлэг худалдаа үйлчилгээ гээд нийтдээ 190 гаруй барилга, зам талбай, ногоон байгууламж бүхий орчин үеийн тохилог шинэ хороолол сүндэрлэх юм байна.
        Үүний тулд тус хэсгийн 1500 орчим айлын өмчлөлийн газрыг шинэ орон сууцаар солих аж. Энэхүү их бүтээн байгуулалтын ажилд 300 гаруй сая ам.долларын хөренгө оруулалт хийх бөгөөд уг төсөл 7-8 жилийн хугацаанд хэрэгжинэ. Үүнээс эхний ээлжид 14 дүгээр хорооны долоон га талбайд 1600 айлын орон сууц, худалдаа  үйлчилгээний 62 барилга барьж, тус хэсгийн 90 гаруй өрхийг орон сууцтай болгох аж.
        Баянзүрх дүүргийн 14 дүгээр хорооны оршин суугч Л.Төвхөө "Энэ гэр хороололд олон жил амьдарсан бид жишиг 14 дүгээр хороололтой гэрээ хийж газраа чөлөөлж өгсөн. Ингэснээр ирэх жил ашиглалтад орох эхний 336 айлын орон сууцнаас байртай болох юм" хэмээн ярилаа. Цаашид Улаанбаатар хотод зургаан гэр хорооллыг ийм маягаар дахин төлөвлөж барилгажуулах юм.