Москва хотноо баригдах гэж буй "Россия" барилга нь Европын хамгийн өндөр байшин болохоор өрсөлдөх гэнэ. Энэхүү байшингийн архитектор Норман Фостер барилгын шав тавих ёслолд оролцсоны дараагаар "Вести" мэдээллийн телевиз түүнээс ярилцлага авсан байна.

-"Россия" барилгыг дэлхийн хэмжээний томоохон проект болно гэх юм? Онцлог болон нууц нь юу вэ?
-Энэ байшингийн бүх зүйл онцгой. Гадаад үзэмжээсээ л онцлог зүйлүүд нь эхэлнэ дээ. 600 метрийн өндөртэй, салхины чигээр 120 градус эргэлддэг барилга юм. Шинэлэг технологиор хийгдсэн тогтвор сайтай фундаменттай (суурь) учир аюулгүй байдалд санаа зовох зүйлгүй. Тус барилгад оффис, дэлгүүр, метроны буудал, зочид буудал, амралт үйлчилгээний газрууд болон оршин суух байр гэх мэт цогцолбор болно. Энэ байшин нь хот доторх жижигхэн хот юм.

-Хот доторх хот гэдэг чинь маш сонихолтой юм байна шүү? Үүнийгээ дэлгэрэнгүй тодруулж өгөөч?
-Олон зүйлийг нэг байшин дотор нийлүүлж багтаасан юм. Жишээ нь та энд орон сууц худалдан авахын сацуу гаднаа цэцэрлэг, хүлэмж байгуулах газар худалдаж авч болно. Байшингийн гол нууц бол ямар ч газар хөдлөлт, хар салхинд тэсвэртэй. Учир нь байшингийн проектодээр мэргэжлийн нэлээн хэдэн хүмүүс гурван жилийн турш маш нарийн судалж, шалгаж ажилласан билээ.

-саяхан дэлхий даяар Нью Йоркийн өндөр цамхагруу дайрсан террорист халдлагын ээлжит ойг тэмдэглэсэн. Таны энэ барилга руу дайрна гэсэн баталгаа байхгүй шүү дээ?
-Бид дэлхийн өндөр барилгуудын проектуудын туршлагыг нарийн судлаж энэ тал дээр нэлээн анхаарал тавьсан. Одоогоор террорист халдлагын хамгаалалт нь нууц үлдэг.

-Зарим шүүмжлэгчид таны "Россия" барилгыг Москва хотын үзэмжийг эвдэнэ гэж ярьж байгаа тухай таны бодол?
-Байшин, барилгын хэр удаан оршин тогтнох нь түүний цаг үедээ хэрхэн тохирсонтой холбоотой юм. Тиймээс цаг хугацаа бүгдийг шүүнэ гэж бодож байна. Онцлон хэлэхэд бидний энэ бүтээл бол архитекторын урлагт тэсрэлт болсон хамгийн шинэлэг дизайн тул цаг хугацааны урт удаан үед орших болно.

-Та анх Москва хотын удирдлагуудад мянган метрийн өндөртэй барилгыг санал болгож байсан санагдах юм? Энэ тухай...
-Бид нар ярилцсаны эцэст өндөр байшин барих нь чухал бус харин чанартай нь илүү гэж үзсэн. "Россия" барилга ч үүнийг батлах биз ээ. Тус байшин хотын бэлэг тэмдэг болно гэдэгт итгэлтэй байна.

-10-20 жилийн дараа гэхэд архитекторын урлаг хэрхэн өөрчлөгдөх бол?
-Ямар ч барилгын өөрчлөлтөнд мэдээж шинэ технологи маш их үүрэг гүйцэтгэнэ. Тийм ч учраас барилгууд илүү бат бөх, аюулгүй байдал дээд зэргээр хангагдсан байхаас гадна технологийн дэвшилтээр барилга бүр дахин давтагдашгүй. өөрийн гэсэн өвөрмөц онцлогтой байх болов уу

-Архитектор бүр өөрийн гэсэн "Пирамид"-ыг бүтээж энэ ертөнцөд мөнхөд үлдээхийг мөрөөддөг гэж ярьдаг шүү дээ?
-Би шинэ проектыг эхлүүлэх бүртээ өөрийн хамаг авьяас чадварыг шингээдэг. Энэ насандаа цорын ганц зүйл хийж буй мэт бодож бүтээлээ туурвидаг даа.