Манай улсад барилга барих зөвшөөрөл авахын тулд хоёроос гурван жил болж, ажил хийхэд түвэгтэй байна гэж зөвшөөрөлгүй хэмээн адлагдаж байгаа барилгын компаниудын эзэд гомдоллож байна. Нэг агентлагийн хурган даргаас эхлэн зөвшөөрөл авч гарын үсэг зуруулж явсаар 200 гаруй бичиг баримт бүрдүүлдэг нь барилгын компанийнханд дарамт болдог аж. Бичиг баримт бүрдүүлэх гэж хоёр гурван жил хөөцөлдөхийн оронд барилгын ажилтайгаа зэрэгцээд зөвшөөрлөө хөөцөлдөх нь амар байдаг гэх хүн ч байна. Үнэхээр барилгын компаниудыг хууль зөрчсөн хэмээн адлахаас урьдаж тэдэнд хууль эрх зүйн орчныг нь сайтар бүрдүүлж өгөх шаардлагатай байна. Сүүлийн үед барилгын салбарын хууль эрх зүйн орчныг сайжруулах талаар санал санаачилга гарч энэ салбарыг эмх цэгцэнд оруулах ажил өрнөж байна. Энэ асуудлыг бид дараагийн дугаартаа сурвалжлах болно. Харин энэ удаад барилгын компанийн эзэдтэй ярилцсанаа хүргэж байна.

“Эдшил” ХХК-ийн захирал Ө.Ганболд: Хууль зөрчсөн үйлдэл мөн үү, биш үү гэдгийг ялгаж салгах хэрэгтэй

-Танай компанийн барьж бай­гаа барилга зөвшөөрөлгүй барилгын жагсаалтад орж үйл ажил-лагааг нь зогсоох шийдвэр гарчихаад байна. Барилгаа барьж эхлэхдээ зөвшөөрөл авч болоогүй юм уу?

 -Хүмүүс барилгын зөвшөөрөл гэхээр ганцхан юм байдаг гэж ойлгоод байх шиг байна. Гэтэл барилга барих зөвшөөрөл авахын тулд 100 гаруй зөвшөөрөл шаардлагатай болдог. Зөвхөн зөвшөөрөл авахын тулд л хоёр жил болж байна шүү дээ. Барилга барихад хамгийн гол зөвшөөрөл нь тухайн газарт барилга барьж болохыг зөвшөөрсөн нийслэлийн Засаг даргын захирамж байдаг. Дараа нь хэдэн давхар, ямар барилга барих гэж байгаагаа хотын ерөнхий архитектортой зөвшилцөж зөвшөөрөл авна. Үүний дараа барилгын ажлын зургийг батлуулдаг. Тухайн зураг нь зөв болсон эсэхийг улсын экспертизээр хянуулдаг юм. Барилга барихад эдгээр зөвшөөрөл хамгийн чухал байдаг. Манай компанийн барьж буй барилгын хувьд эдгээр зөвшөөрлийг бүгдийг нь авчихсан байгаа. Ингээд хамгийн сүүлд НМХГ-аас барилга угсралтын ажлыг эхлүүлэх, үргэлжлүүлэх зөвшөөрөл авдаг. Харин уг зөвшөөрлийг аваагүй юм.

-Мэргэжлийн хяналтаас энэ зөвшөөрлийг авахад тийм хэцүү байна уу?

-Энэ барилгын ажлыг 2008 онд эхэлсэн. Барилгын ажлыг эхлэхдээ зөвшөөрөл авах гэсэн боловч жижиг сажиг асуудлаас болоод авч чадаагүй. Барилгын ажил эхлүүлэхэд шаардлагатай хамгийн чухал зөвшөөрлүүдийг нь бид авсан гэж дээр хэлсэн. Ганцхан зөвшөөрөл өгөх гэж бага сага юмаар барилгын ажлыг саатуулж байсан учраас бид хүлээж чадалгүй эхэлчихсэн юм. Мэдээж хэрэг бидний буруу бий. Гэхдээ бид ч гэсэн эх орныхоо бүтээн байгуулалтад хувь нэмрээ оруулж байна шүү дээ.

-Ойрын үед барилгын ажилтай холбоотой ноцтой ослууд гарч цөөнгүй хүний амь нас эрсдлээ. Эдгээр осол зөвшөөрөлгүй бариг­даж буй барилгатай холбоотой учраас хууль зөрчин барьж буй барилгуудыг бүгдийг нь нураах ёстой. Тэгж байж л эмх цэгцтэй болно гэх боллоо. Үүнийг юу гэж үзэж байна вэ?

-Барилгын ажлыг зөвшөөрөлгүй барьж байгаагаас болж иргэд хохирч бүр эрдэнэт хүний амь нас эрсдэж байгаа бол төр тэдэнд төмөр нүүрээ харуулах нь зүйн хэрэг. Гэхдээ ангилалд багтсан барилгуудыг бүгдийг нь нураана гэх нь буруу шүү дээ. Хууль зөрчсөн үйлдэл мөн үү, биш үү гэдгийг тогтоож ялгаж салгах нь чухал байна. Гэтэл сүүлийн үед зөвшөөрөлгүй л бол нураана, улсын орлого болгоно торгоно гэх маягийн юм ярих болж. Ингээд байвал хувийн хэвшлийнхэн чинь яаж хөгжиж дэвших юм бэ.

-Мэргэжлийн хяналтын бай­цаагч нар танай барилга дээр ажилласан гэсэн. Ямар шийдвэрт хүрч байгаа юм бол?

-Бүх асуудлыг төрийн хүнд суртал руу чихээд өнгөрч болохгүй. Бидэнд ч бас буруу байгаа. Энэ барилгын ажил эхэлж байхад мэргэжлийн хяналтын байцаагч нар ирж торгуул тавьсан. Торгуулаад өнгөрсөн болохоор ажлаа үргэлжлүүлж болох байх гэж бодож байтал ийм асуудал болчихлоо. НМХГ-аас хоёр хоногийн өмнө энэ барилга дээр ирж ажилласан. Бид бүх бичиг баримтыг нь бүрдүүлээд өгчихсөн болохоор одоо асуудалгүй л гэж бодож байна.

“Тамирын шугуй” ХХК-ийн захирал н.Лхагвадорж: Ажил хийж байгаа хүмүүсийг дэмжих биш араас нь чангааж байна

-Хотын дарга Э.Бат-Үүл танай барилгын үйл ажиллагааг зогсоох захирамж гаргачихаад байхад яагаад өдий болтол ажилласаар байгаа юм бэ?

-Ер нь бол манай барилгын ажил дуусчихсан байгаа. Гэтэл Мэргэжлийн хяналтын ерөнхий газраас барилгын ажлыг эхлүүлэх зөв­шөөрөл аваагүй гэсэн шалтгаанаар ашиглалтад оруулахгүй байна. Барилгын ажил эхлүүлэх зөв­шөөрөл авах гэж л хоёроос гурван жил болж байна шүү дээ. Ер нь төрийн байгууллагууд ямар ч уялдаа холбоогүй ажиллаж байна. Барилга барих зөвшөөрөл авах гэж гурван жил болно. Бариад эхэлсэн хойно нь ашиглалтад оруулахгүй. “Тамирын шугуй” ХХК 100 гаруй ажилчинтай. Тэдний цалин хөлс, нийгмийн даатгал гээд бүх асуудлыг шийдэж байна. Хувийн секторууд улсын хөгжилд багагүй хувь нэмэр болж байгаа. Ийм байхад чирэгдэл учруулж байгаа нь түвэгтэй байна.

-Гэхдээ зөвшөөрөлгүй барилга барьж байгаа нь танай компанийн буруу мөн биз дээ?

-Энэ барилгыг барихын тулд бид шаардлагатай бүх бичиг баримтыг бүрдүүлж өгсөн. Харин цахилгааны техникийн шийдлийг өөрчилөхөд бага зэрэг хугацаа шаардлагатай болсон учраас бичиг баримтаа жаахан хүлээж байгаад өгье гэж мэргэжлийн хяналтын байцаагчаас хүссэн юм. Гэтэл манай барилгын ажлыг эхлүүлэх зөвшөөрөл өгөөгүй.

-Барилга барьж буй ком­паниудын олонх нь газрын асуудалтай байна. Танай компанийн хувьд энэ газрын яаж хувьчилж авсан бэ?

-Энэ газрыг найман жилийн өмнө оффисийн зориулалттай барилга барихаар хувьчилж авсан. Ер нь манайд хийж бүтээж байгаа хүмүүстээ дэмжлэг үзүүлэх биш харин араас нь чангааж байх юм.

Н.Санжаасүрэн ipost