Нийслэлийн Засаг даргын “Зөвшөөрөлгүй эхэлсэн барилгын ажлыг зогсоох тухай” Монгол Улсын Засаг захиргаа, нутаг дэвсгэрийн нэгж, түүний удирдлагын тухай хууль, Төрийн хяналт шалгалтын тухай хууль, Автотээврийн тухай хуулийн заалтуудыг үндэслэн захирамж гаргажээ.

Уг захирамжаар, Нийслэлийн нутаг дэвсгэрт хөдөлмөр хамгаалал, аюулгүй ажиллагааны арга технологи, шаардлага зөрчигдөж, иргэдийн амь нас, эрүүл мэнд, эд хөрөнгөөр нь хохироох явдлыг таслан зогсоох зорилгоор эрх бүхий байгууллагын зөвшөөрөлгүйгээр хийгдэж буй нийт барилгын ажлыг зогсоож, хуулийн дагуу арга хэмжээ авахыг Нийслэлийн Мэргэжлийн хяналтын газарт даалгажээ. Мөн эрх бүхий байгууллагын зөвшөөрөлгүйгээр баригдсан болон баригдаж байгаа барилгыг ус дулаан, цахилгаанаар хангахгүй байхыг Ус сувгийн удирдах газар, “Улаанбаатар дулааны сүлжээ”, “Улаанбаатар цахилгаан түгээх сүлжээ” компанид даалгасан байна.

Нийслэлийн нутаг дэвсгэрт баригдаж буй нийт барилга байгууламжийг барих, барилга угсралтын ажилд ашиглагдаж буй машин, механизм, тоног төхөөрөмж, өргөх байгууламжийг хөдөлмөр хамгаалал, аюулгүй ажиллагааны арга технологи, шаардлагыг хангаж байгаа эсэхийг шалгаж гэрчилгээжүүлэн, журам тогтоож үр дүнг нь ирэх сарын 10-ны дотор танилцуулахыг Замын цагдаагийн газар, Нийслэлийн цагдаагийн газар, Нийслэлийн Мэргэжлийн хяналтын газарт үүрэг болгосон энэхүү захирамжийг Нийслэлийн Засаг дарга уржигдар  гаргасан байна.