НИТХ-ын Тэргүүлэгчдийн ээлжит хурал боллоо. Хуралд нийслэлийн Засаг даргын Санхүү, эдийн засгийн асуудал хариуцсан орлогч дарга Н.Батаа 2012 оны төсөвт авто замын шинэ технологи оруулж ирэх үүднээс хуваарилагдсан 300 сая төгрөгийн зориулалтыг нь өөрчлөн төсвийн тодотголд оруулах асуудлыг оруулж хэлэлцүүллээ. Зориулалтыг нь өөрчлөн,  энэ хөрөнгөөр нийслэлийн авто замын зорчих хэсгийг аюулгүй болгох үүднээс засварт ашиглах аж.

Тэргүүлэгчдийн хуралд Нийслэлийн өмчийн харилцааны газраас Хан-Уул дүүргийн Тамгын газрын дансанд бүртгэлтэй байдаг “Найрамдал”-ын цагаан хаалга, мөн дүүргийн “Буянт-Ухаа” цагаан хаалгыг нийслэлийн өмчөөс хасах тухай асуудлыг  оруулж хэлцүүллээ. Тэргүүлэгчдийн хурлаас “Буянт-Ухаа” цагаан халгыг хэвээр нь үлдээж, найрамдлын цагаан хаалгыг нийслэлийн өмчийн бүртгэлээс хасах нь зөв гэж Тэргүүлэгчдийн олонхи үзлээ. Нийслэлийн өмчийн харилцааны газрын дарга Ш.Төмөрбаатар СБД-ын 8-р хорооны нутаг дэвсгэрт байрлах В.И. Лениний хөшөөг нийслэлийн өмчөөс хасуулах талаар тогтоолын төсөл оруулж хэлэлцүүллээ. Энэхүү хөшөө дурсгалын суурь бэхэлгээ муудсан ажээ. Тэргүүлэгчид эл тогтоолын төслийг хэлэлцэх үеэрээ өмчөөс хасч болно. Гэхдээ цааш нь өөр газар байрлуулах боломжгүй юм байна. Иймд тухайн хөшөөг өөрийн өмчлөлд байлгах хүсэлтэй  иргэд байж болох юм. Тэгвэл тэдэнд ийм боломж олгох үүднээс одоогийн нөхцөлийг алдагдуулахгүйгээр зөөж байрлуулах нөхцөлтэйгөөр суурин дээр нь дуудлагаар худалдвал яасан юм гэсэн санааг зарим төлөөлөгч хөндөв. Санал хураалтаар уг хөшөөг нийслэлийн өмчөөс хасах нь зөв хэмээн Тэргүүлэгчдийн олонхи үзлээ.

СБД-ийн 3-р,11-р сургуулийн барилгыг буулгаж суурин дээр нь шинэ сургууль барих болсон тул тэдгээрийг мөн л нийслэлийн өмчөөс хасч, 2013 оны эхний хагас жилд багтаан буулгаж, суурин дээр нь шинэ сургууль барих нь зөв гэсэн шийдвэр гаргалаа. Нийслэлийн БГД-ийн 38,73-р сургууль, тус дүүргийн 47,57 БЗД-ийн 146, СХД-ийн 26-р  цэцэрлэгийн ашиглалтын хугацаа дуусч байгаа тул БНХАУ-ын буцалтгүй тусламжаар суурин дээр нь шинээр сургууль цэцэрлэг барих болсонтой холбогдуулан тэдгээрийн эргэн тойрон дахь нийтийн өмчийг нийслэлийн данснаас хасах тогтоолын төсөл батлагдлаа. Тогтоол батлагдсанаар тухайн ажлыг зохион байгуулах үүрэг Нийслэлийн боловсролын, Өмчийн харилцааны газуудад хариуцуулав.