Барилгын салбарын мэргэжлийн арван нэгэн холбоод тус бүрдээ төр засгийн байгууллагуудтай харилцах нь бэрх байдаг учраас нэгдсэн зохион байгуулалтанд орж, ялангуяа бодлогын шинжтэй түгээмэл асуудлуудаараа төр засгийн байгуулагуудтай нэгдмэл байдлаар харилцахын тулд “Барилгын Хөгжлийн Үндэсний Нэгдсэн Төв” төрийн бус байгууллагыг байгуулан удирдах зөвлөлийн даргаар гавьяат эдийн засагч Л.Нямсамбуу, гүйцэтгэх захирлаар Г.Оюун нар сонгогдон ажиллаж байна.

       “Барилгын Хөгжлийн Үндэсний Нэгдсэн Төв”-ийн зорилт нь барилгын салбарын хөгжлийн асуудлаар мэргэжлийн байгууллагуудаас гарган ирсэн санал, бодлогыг засаг төрийн сонорт хүргэж шийдвэрлэх, үндэсний хэмжээний хөтөлбөр төлөвлөгөө боловсруулахыг гол бодлогоо болгох  явдал юм. Энэ бодлогыг хэрэгжүүлэхийн тулд хот байгуулалт, архитектур зураг төсөл, барилга угсралт, барилгын материалын үйлдвэрлэлт, инженер геологи, геодези, зураг зүй, барилгын механикжуулалт зэрэг чиглэлээр үйл ажиллагаа явуулж байгаа бүх аж ахуй нэгжүүдийг хамруулж, тэдгээрээс барилгын салбарыг хөгжүүлэхээр гарч байгаа санал бодлыг солилцох ажлаа эхлүүлж байна. Барилгын салбарын эдгээр аж ахуй нэгжүүдэд үйл ажиллагаагаа хэвийн явуулах, хэвийн өргөлжүүлэхийн тулд тулгарч буй бэрхшээлийг арилгахын тулд ямар арга хэмжээ авах, ялангуяа төр засаг, яам тамгийн газраас ямар арга хэмжээ авах талаар саналаа ирүүлээхийг сонордуулж байна. Мөн үүнийг шийдвэрлэх ямар арга байгаа талаар санал сэтгэгдэлээ ирүүлж болох юм. Аль болох амьдралд ойрхон, прагматик саналаа ирүүлснээр түүнийг хэрэгжүүлэхэд дөхөм байх ба  эдгээр саналуудыг хүлээн авсны дараа бүгдийг нь нэгтгээд барилгын салбарыг хөгжүүлэх чиглэлээр ойрын болон дунд хугацаанд явуулах бодлогын төслийг “Барилгын Хөгжлийн Үндэсний Нэгдсэн Төв” гаргах болно. Энэ байгууллага нь барилгын салбарын өөрөө өөрийгөө удирдах газар  болж ажиллах юм. Тиймээс юуны түрүүнд салбарын тулгамдсан асуудлыг шийдвэрлэх тухай бодлого гаргах нь чухал байна.

     Бодлогоо боловсруулаад гаргаад ирсний дараагаар шат дараалан хэрэгжүүлэх үйл ажиллагаа явуулах хэрэгтэй. Үүнийг хэрэгжүүлэхийн тулд ямар арга хэмжээ авах хэрэгтэй талаар болон барилгын салбарыг хөгжүүлэхийн тулд салбарынхан өөрсдөө санал бодлоо чөлөөтэйгөөр солилцож,  асуудлуудыг илүү дэлгэрэнгүйгээр авч хэлэлцэх хэрэгтэй. Тэгэхдээ барилгын салбарын хөгжлийн асуудлуудыг өөрийн эрх мэдэл, статусын хүрээнд авч үзэж түүнд чиглэсэн үйл ажиллагаа явуулах ба барилгын салбарын хөгжлийн асуудлаар мэргэжлийн холбоодын байр суурь, бодлогыг нэгтгэн илэрхийлэх, түүнийг төр, засгийн бодлогод тусган, хамтран хэрэгжүүлэх ба барилгын салбарын мэргэжлийн байгуулагуудаас гаргаж тавих асуудлууд нь нэн түрүүний ажлын чиг үүрэг болоод байна. Дараа дараад нь салбарын холбогдолтой хууль, эрх зүйн актуудын төсөл, үндсэн чиглэл, салбарын болон үндэсний хөтөлбөр, төлөвлөгөө боловсруулах, байр сууриа илэрхийлэх, хэрэгжүүлэхэд оролцох, салбарын ажилтнуудын мэргэжил дээшлүүлэх, давтан сургалт, мэргэжлийн зэрэг олгох үйл ажиллагааг зохион байгуулах, барилгын норм ба дүрэм, стандарт, чанарын хяналтын тогтолцоог боловсронгуй болгоход төрийн байгууллагуудтай хамтран ажиллах юм. Барилгын салбараар үйл ажиллагаа явуулж буй бүхий л аж ахуй нэгжүүд энэ үйл ажиллагаанд идэвхитэй оролцож санал бодлоо чөлөөтэй илэрхийлэхийг урьж байна.

                                                                                             Утас : 99013068                И-мэйл: monef@magicnet.mn