Нийслэлийн нийтийн эзэмшлийн зам талбайн асуудал нэн хундрэлтэй. Хот өнөөдөр 360 гаруй км хатуу хучилттай хар замтай. Мөн 40 гаруй км цементэн хучилттай зам байдаг гэнэ. Түүнчлэн дээрх замуудын хоёр талаар 800 гаруй км явган зорчигчдод зориулсан талбайтай аж. Эдгээр явган хүний зорчих зам талбайн 90 гаруй хувь нь стандарт шаардлага хангаагүй, энх тавигдсанаас нь хойш олон жил ашиглаж байгаа, борооны ус зайлуулах шугам хоолойгүй юм байна.
        Мөн хагарч ан цав гарсан, иргэд түүнд нь тээглэж унах тохиолдол олон. Өвөл нь хөлдөн овон товон болж, газар гэсэхээр доошоо суулт өгөх зэрэг хүндрэл байгаа. Уг зам талбайг дүүргүүдийн Хот тохижуулах, нийтийн аж ахуйн хэлтэс болон Тохижилт үйлчилгээний компаниуд хариуцдаг гэнэ. Гэвч тэд эдгээр явган хүний замуудаа эзний ёсоор харж, арчилж чадахгүй байна. Дээрх 800 гаруй км явган хүний замыг сайжруулахаар 2002 оноос төсөл, хөтөлбөр боловсруулж өнгөт чулуун хавтанг тавьж эхэлсэн. Өнөөдөр явган хүний зам тавих, сайжруулах, өнгөт хавтан тавих ажил ердөө л 15 гаруй хувьтай явж байгаа гэнэ.
        Төсөл хэрэгжээд талдаа ч ороогүй байхад хуурч эвдэрч эхэлжээ. Шинээр тавьж байгаа өнгөт хавтангаар хийж байгаа зам нь үзэмжээс цаашгүй, иргэдийн амар амгалан явах боломжийг хааж байгаа. Өвөлдөө цас ороод хайлмагтахаар хальтиргаа гулгаа ихтэй болж, газрын цэвдгээс үүдэн тавьсан зам нь дээшээ овойн гардгаас иргэд бүдэрч унах, гэмтэж бэртэхэд хүргэж байгаа. Уг замуудаас болж гэмтэж бэртсэн хүний тоо өвлийн улиралд өсөж, эмнэлгийн ачааллыг багагүй нэмэгдүүлдэг байна. Эдгээр замуудыг муутгаж байгаа өөр нэгэн зүйл нь яах аргагүй газар шорооны ажил хийж байгаа аж ахуйн нэгжүүд юм. Дулааны улирал болоод ч тэр үү ажил нь идэвхжиж энд тэндгүй эвдэрч хэмхэрсэн зам, талбай байх аж. Өнөөдөр тавьсан замаа маргааш нь сэтлээд газар ухаж байгаа дүр зураг нийслэлд хаа сайгүй харагдах болсон. Иргэд энэ байдалд шүүмжлэлтэй ханддаг ч хөрөнгө оруулалт нэрээр өмнө хийсэн ажлаа устгаж сүйтгэж байгаа нь харамсалтай юм. Кабель татна, дулааны шугам солино, барилгын өргөтгөлийн ажил гэх мэт явган хүний замд сөргөөр нөлөөлөх хүчин зүйл их. Юм хийж бүтээж болно, гэхдээ өмнө хийсэн зүйлээ өөд нь татаад сайхан засаад авч болохгүй гэж үү.
        Тэгж чадах аж ахуйн нэгж байгууллагуудаар нь засварын ажлаа даатгаж, хяналтыг нь сайжруулмаар байна. Цаашид эдгээр байгууллагад тооцох хариуцлагын асуудлыг яримаар байгааг иргэд сануулсаар байгаа. Ядаж өмнө хийсэн зам талбайнхаа хөрөнгийг эвдэж сүйтгэсэн аж ахуйн нэгжүүдээр нөхөн төлүүлэх механизм хэрэгтэй байгааг хаа хаанаа ойлгохсон. Дүүрэг, хороодын удирдлага ч энэ тал дээр анхаарал хандуулж, ажлын зохион байгуулалтаа чангаруулах хэрэгтэй болов уу. Зохион байгуулалт, хариуцлага, хяналт шалгалтыг төвлөрүүлэх нь зүйн хэрэг. "Бид мэдэхгүй, тийм байгууллагын харьяалах асуудал байна" гэх зэргээр нэг нэгэн рүүгээ түлхэх нь оновчтой шийдэлд хүргэхгүй. Түүнчлэн явган замыг шинэчлэх ажилд оролцож байгаа ажилчдын ур чадварыг нэмэгдүүлэх талдээр анхаарах хэрэгтэй байгаа. Ямар ч туршлагагүй хэдэн хүнээр чулуу эвлүүлж шахах нь тийм ч чанар сайнтай, үр өгөөжтэй бүтээн байгуулалтын ажил биш. Энэ нь эдэлгээ чанарт шууд нөлөөлж байгааг хэн ч үгүйсгэхгүй биз ээ.