Барилгачины нүдээр харахад

Barilga
2019-11-05

Барилгачины нүдээр харахад

Зуслангийн байшин барихыг завдаж байгаа хэн бүхэн өөрийн найз, өөр хэн нэгэн танилынхаа гаргасан алдаа давтахгүй байхыг хичээдэг. Газар худалдаж авах, зураг төсөл хийлгэх, барилгадаа ямар материал ашиглах вэ гэдгийг сайтар тунгаах хэрэгтэй юм. Хотоос зайдуу амьдрахыг хүсч байгаа хэн боловч юун түрүүн өөрийн хүсэл юу болохыг, боломж бололцоо ямар байгаагаа тунгааж үзэх нь зүйтэй.
Бидний танд өгөх зөвлөгөө бол өөрөө өөрийнхөө хүслийг дагаарай гэж хэлэх байна. Өнөөдөр барилга захиалан бариулж байгаа хүмүүсийн 90% нь өвлийн байшин бариулахаар хандаж байгаа юм. Хүмүүс хотод амьдрахаас залхаж, харин хотын захдуу зусланд амьдрахыг эрхэмлэх болсон бөгөөд хэт идэвхитэй амьдралаас үүдсэн элдэв стресс зэргээс болж чимээ шуугиангүй, цэвэр агаартай орчинг эрхэмлэх болжээ.
Өндөр гэгч нь хашаатай тоосгон байшин бас үеэ өнгөрөөжээ. Орчлон дэлхийг үзэж, амт таашаалыг мэддэг болсон хүмүүс үл хөдлөх хөрөнгөд мөнгө хаяж сонин содон хийц загвартай байшин бариулах хүсэлтэй болсон байна.

Та байшин бариулахын тулд:

Юуны өмнө, ямар байшин бариулах хүсэлтэй байгаагаа бодож үзээрэй. Танд өвлийн коттеж эсвэл зуны сууц хэрэгтэй юу, модоор бариулах уу тоосгоор бариулах уу, энэ бариулах сууцандаа байнга суух уу, эсвэл зөвхөн зун суух уу, хотод ойр байх уу эсвэл нам гүм газар байх уу, эсвэл бүр ойн чөлөөнд байвал дээр үү гэдгийг бодох хэрэгтэй. Энэ бол наад захын шаардлага бөгөөд цаашид яаж хийж болох талаар архитектор, барьж буй хүмүүстэйгээ ярилцах нь зүйтэй.
Барилгыг барих газраа гүйцэтгэгч, архитектортойгоо хамтран сонгох нь дээр. Энэ тохиолдолд гүйцэтгэгч нь тухайн газрын топографийн картыг анхааралтай судлаж, харин архитектор ландшафтын байдлыг тодорхойлно. Газрын байдлыг судалсны үндсэн дээр ямар хөрстэй болохыг тогтоох ба үүн дээр тулгуурлан байшингийн суурь тавих болоод барих загварыг тодорхойлно. Мөн цахилгаан, усан хангамж, зам харилцааны ойр байх зэргийг бодолцох хэрэгтэй. Та дизелийн дэд станц, дулаанаар хангах систем, гүний худаг гаргаж ч болно. Гэхдээ та энэ бүхнийг урьдаас шийдсэн байх хэрэгтэй. Түүнээс гадна, архитектор ландшафтын талаар, тухайлбал, ямар мод суулгах, суулгахгүй байх зэргээр өөрийн зөвлөгөөг өгнө.
Мөн таны хөрш айлууд ямар хүмүүс байх нь багагүй нөлөөтэй. Хэрвээ элдэв асуудлаар дүүрэн хүмүүстэй айлсаж байгаа бол тийм ч таатай байхгүй нь ойлгомжтой.
Газраа авлаа. Байшингаа бариулах хэрэгтэй боллоо. Одоо байшингийн хэмжээ, хэдэн давхар өрөөтэй байх, цэцэрлэг, бассейн, саун, угаалгын, ариун цэврийн хэдэн өрөөтэй байх, биллъярдны юмуу дасгалын өрөө хэрэгтэй эсэх, хэдэн машины гарааштай байх/хамтдаа эсвэл тусдаа/, халаалтыг яаж шийдэх/пийшин, батарейтай котел/мазутын, хийн, цахилгаан/тавих уу, халдаг шал, халаагч, паар, нарны зай тавих уу, агааржуулалтыг хэрхэн хийх, дээвэр нь ямар байх талаар дэлгэрэнгүй ярилцъя. Өөрийн төсөөлөлдөө хүрэх гэж хичээгээрэй, боломжгүй зүйл гэж байхгүй шүү дээ. Мансардын цонх, шилэн дээвэр, гэрийн боулинг, теннисний талбай зэргээр юу ч байж болно. Үнэндээ, мөнгөгүй байхаас бусад үед саад бэрхшээл болгоныг давдаг зүйл бол болно, бүтнэ гэсэн бодол сэтгэл юм.
Зураг төсөл, төлөвлөгөө бол зөвхөн дизайнер, архитекторын ажил бус 3-4 долоо хоног үргэлжлэх захиалагч гүйцэтгэгчийн хамтын ажиллагаа гэж ойлговол зохино. Захиалагч нь голчлон сэтгүүлийн каталогоос харж байшингийнхаа загвар, төслийг сонгодог. Энэ төслийг хэвлэж гаргасан сэтгүүлийн газраас холбогдох материалыг нь худалдаж авах, аль эсвэл барилгын компаниар хийлгэх шаардлагатай болно. Гэхдээ өөрийн тань бодож төлөвлөсөн зүйл чухал шүү.
Хэрвээ та ямар загвартай байшин барихаа сайн мэдэхгүй байгаа бол танд сонголт хийхэд хялбар байдлаар архитектор 3-4 төсөл хийж өгдөг. Захиалагчаа анхааралтай сонсдог туршлагатай архитектор бол сайтар ярилцсаны дараа хэдэн засвар өөрчлөлт хийгээд л нэг сайн зураг төсөл хийгээд өгнө. Мөн сонгож харахад дөхөм болгож төлөвлөлтийг хэд хэдэн хувилбараар зурж өгдөг. Харин үүнд нь нухацтай хандаж, ямар нэгэн өөрчлөлт хийлээ гэхэд тодорхой хэмжээний хөдөлмөрийн болоод материалын зардал гаргаж, ажил явагдах хугацааг удаашруулахад нөлөөлнө гэдгийг анхаараарай.
Зураг төслийн үндсэн дээр ажлын хийгдэх дараалал бүрийг харуулсан зураглал гаргана. Энэ графикийг захиалагчтай зөвшилцөн хийнэ. 4 сарын 1 гэхэд зураг төслийг гаргуулсан байвал болно. Харин бариулах газраа намар сонгох нь дээр бөгөөд өвөл болохоор цасанд дарагдаж, зун болохоор ногоо урган мөн адил баримжаалан харахад төвөгтэй болдог тул 9-с 10 сар бол тохиромжтой үе гэж үзэж байна.
Ажлын графиктай уялдуулан төлбөр хийх графикийг гаргаж болно. Хэрвээ танд хэт тансаг ч юмуу, зардал ихтэй санагдаж байвал мэдээж, хийлгэхээр гаргуулсан зураг төсөлдөө ажлын графикт орохоос өмнө өөрчлөлт хийлгүүлээрэй.
Аль болохоор хэмнэхийг хичээгээрэй. Гэхдээ барилгыг барих газрын судалгаа, зураг төсөл, суурийн ажил, дээврийн болон материалын зардалаас хасаж болохгүй. Хэрвээ зайлшгүй шаардлага тулгарвал дотоод засал чимэглэлд орох зүйлсийн зардалаас хасаарай.