Зургаан хувийн зээлд хамрагдахыг хүссэн иргэд 55 метр.квадратаас дээшгүй байр сонгох ёстой. Гэвч ийм метр.квадраттай орон сууцны сонголт байхгүй, 100 мянган айлын орон сууц хөтөлбөрийн жагсаалтад байгаа байруудыг бэлэн мөнгөтэй иргэдэд зарсан, захиалга дууссан гэх зэргээр иргэдийг буцаасан явдал цөөнгүй гарчээ. Иргэд үүнд маш их бухимдаж байгаа юм. Энэ талаар "Гангар инвест" компанийн маркетингийн менежер С.Лхагважаваас тодруулсан юм.

-Зургаан хувийн зээлд хамрагдан байраа сонгохоор танай компанийг зорьсон иргэд цөөнгүй байна. Байрны сонголт дуусчихсан бэлэн мөнгөтэй хүмүүст зарсан гэх яриа байна. Энэ үнэн үү?
-Манай компанийн барьж байгаа "Ногоон төгөл" хороололд захиалга авч байгаа нь үнэн. Яагаад гэвэл Зам, тээвэр, барилга, хот байгуулалтын яам журмаа танилцуулж гэрээ байгуулаагүй. Ер нь ганц манай компани ч гэлтгүй ямар ч компанитай гэрээ байгуулаагүй юм байна лээ. Би өнөөдөр /өчигдөр/ хүртэл асуусан. Нөгөө гэрээ хийх юу болж байна гэхэд дараа долоо хоногт гэсээр байгаад 14 хоног өнгөрч байна. Зургаан хувийн зээлд хамрагдах гэсэн иргэд маш их ирж, утсаар ч мөн ярьж байгаа. Энэ болгонд гэрээ хийгээгүй, тодорхой болохоор нь ир гэсэн хариулт өгч байна.

-Гэрээ байгуулаагүй юм бол танай компанийн нэр яагаад 100 мянган айлын орон сууцны жагсаалтад байгаа юм бэ?
-Барилгын компаниудын нэрийн жагсаалтыг өнгөрсөн оны арваннэгдүгээр сард гаргасан. Тийм болохоор байгаа байх.

-Зээлтэй холбоотойгоор барилгын компаниуд метр.квадратынхаа үнийг нэмж байгаа. Танайх ямар үнэтэй байна вэ?
-Манай компани байрны үнээ нэмээгүй 1700000-1800000 төгрөг байгаа.

-Танайд "100 мянган айлын орон сууц" хөтөлбөрт өгөх хэчнээн байр байгаа вэ?
-Талбайн хэмжээ заачихсан болохоор 50 метр.квадрат дотор нийт 100 орчим байр байгаа. Харин 50-60 метр.квадратын дотор 40-өөд байр бий. Бусад байрыг нь хүмүүс захиалчихсан.

Барилгын компаниудтай өдийг болтол яагаад журмаа танилцуулж, гэрээ байгуулаагүй болохыг Зам, тээвэр, барилга, хот байгуулалтын яамны Хот байгуулалт, газрын харилцааны бодлогын газрын Орлогч дарга Ц.Баярбатаас тодрууллаа.

-Байрны жагсаалтад багтсан барилгын компаниудын байрнаас сонголтоо хийхээр очсон иргэдийг яам гэрээ байгуулаагүй гэх зэргээр буцаасан байна. Хэзээнээс барилгын компаниудтай гэрээ байгуулах вэ?
-Ер нь "100 мянган айлын орон сууц" хөтөлбөрт хамрагдах орон сууцны барилга, хотхоны жагсаалтыг Засгийн газар эхний ээлжинд 341 дүгээр тогтоолоор баталсан. Уг тогтоолыг баталсанаар өмнө нь жагсаалтад байсан аж ахуйн нэгжүүд дээр нэмэгдээд өнгөрсөн долоо хоногт хоёрдох ээлжийн жагсаалтыг гаргасан. Энэхүү жагсаалтад багтана гэдэг нь "100 мянган айлын орон сууц" хөтөлбөрт багтаж байна гэсэн үг. Дараагийн ээлжинд энэхүү жагсаалтад байгаа компаниудтай гэрээ байгуулах ажлыг зохион байгуулах юм. Барилгын компаниудтай гэрээ байгуулахыг, Засгийн газраас манай яамны сайд болон аймаг, орон нутгийн Засаг дарга нарт үүрэг болгосон. Гэрээний хувьд эхлээд загвар нь гарах ёстой. Дараа нь Зам, тээвэр, барилга, хот байгуулалтын яамны сайд батлаад, гэрээ байгуулах юм.

-Хэзээ компаниудтай гэрээ байгуулж эхлэх вэ. Төлөвлөсөн хугацаа байгаа юу?
-Тун удахгүй. Гэрээ байгуулах нь нарийн ажил шүү дээ. Ямар ч байсан гэрээний загварыг энэ сард багтаад баталчих байх.

-Зургаан хувийн зээлд хамрагдахыг хүссэн иргэд 55 метр.квадратаас дээшгүй хэмжээтэй байр сонгох ёстой. Гэвч хэмжээндээ тохирсон байрны олдоц муу байна. Энэ тохиолдолд яах вэ?
-Заавал 55 метр.квадратаас доош гэсэн шаардлага "100 мянган айлын орон сууц"-ны хөтөлбөрийн журамд байхгүй. Энэхүү хөтөлбөрийн гол зорилго нь бүх нийтийг орон сууцжуулах юм. Дан ганц бага, дунд орлоготой өрхүүдэд биш. Өрхийн орлого нь дээгүүр айлууд ч багтана.

-Тэгэхээр "100 мянган айлын орон сууц" хөтөлбөрийн жагсаалтад орсон байрнаас уг зээлд хамрагдаагүй иргэд авч болно гэж ойлгож болох уу?
-Авч бололгүй яах вэ. Харин зээлд хамрагдаж байгаа иргэд 55 метр.квадратдаа багтааж сонголтоо хийнэ.

Ийнхүү бүх материалаа бүрдүүлж Орон сууц санхүүжилтийн корпорацид өгчихөөд явж байгаа Сонгинохайрхан дүүргийн есдүгээр хорооны иргэн А.Батсүхээс байраа хэрхэн сонгосон талаар асуув. Тэрбээр "Би өмнө нь өөр зээлээр "Эко констракшн" компанийн байрыг авах гэж байснаа энэхүү зээл рүү шилжүүлсэн болохоор байр сонгохоор хайж яваагүй" хэмээн ярьсан юм.

Баянзүрх дүүргийн иргэн Б.Баттулга: Тавин саяын зээл аваад байр авч чадахгүй юм шиг байна

-Материалуудаа бүрдүүлэхэд ганцхан байрны сонголт үлдээд байна. Байр ерөөсөө олдохгүй юм. Хайж, хайж очихоор бэлэн мөнгөтэй хүнд зарчихсан, захиалга дуусчихсан байх юм. Дээр нь байрны үнэ нэмэгдсэн байна. Өмнө нь 1200000 төгрөг байсан бол, одоо 1800000 төгрөг болчихож. Сонгох ёстой байрнуудын жагсаалтад байгаа байрыг бэлэн мөнгөтэй хүнд зарчихаж болдог үгүйг хэлж мэдэхгүй юм. Тавин саяын зээл аваад ч байр авч чадахгүй юм шиг байна.

Ж.Баттуул