Дубай хотод 555 метрийн өндөртэй баригдаж буй "Burj Dubai” дэлхийн хамгийн өндөр барилгын дээд амжилтыг тогтоожээ.
Өмнө нь Канадын Торонто хотын 1976 онд баригдсан "CN Tower"  553 метрийн дэлхийн хамгийн өндөр барилгад тооцогдож байсан юм. " Burj Dubai” барилга нь 2008 оны сүүлч гэхэд баригдаж дуусах бөгөөд одоогоор барилгын эцсийн өндрийг нууцалж байгаа аж.
Судлаачдын таамаглаж буйгаар тус барилга нь 700-800 метрт хүрч магадгүй гэнэ. Төлөвлөгөөний дагуу " Burj Dubai” нь 160 давхартай, 56 лифт, усан бассейн, оффисууд болон Италийн алдартай загвар зохион бүтээгч Жоржио Арманигийн    анхны    зочид буудал байрлах юм.
Энэхүү барилгыг зургаан мянган хүн барьж байгаа аж. Барилгын "Emaag Properties" компани нь 2015 оноос өмнө гэхэд дээрхийн адил зургаан том барилга барих зорилготой байгаа гэнэ. Тэдний нэг нь "Al Burj" барилга 180-200 давхар аж. Нью-Йоркын "Empire State Building" (381 метр), Шанхай хотын "Jin Mao Building" (421 метр), Чикагогийн "Sears tower" (442 метр) болон Малайзийн "Petronas Towers" (452 метр) гэх мэт ДЭЛХИЙД тэнгэрт тулсан өндөр барилга олон байдаг билээ.