Манай улсад оршин суух харийнхны тоо өдрөөс өдөрт нэмэгдэж байгаагийн дийлэнхийг БНХАУ-ын иргэд эзэлдэг. ОХУ бүс нутгаасаа хятад иргэдийг олноор нь нутаг буцааж эхэлснээс очих газаргүй болсон дотор хүмүүсийн урт цуваа ийнхүү манай улсыг зорьсоор л... Тэдний ихэнх нь хууль бусаар цагдаа хүчний байгууллагаас нуугдан манай улсад амьдардаг бөгөөд барилгын компаниудад олноороо хуарагнан байрладаг.
        Тэд ирэхдээ 30 хоногийн хугацаагаар буюу жуулчны визээр орж ирдэг ч оршин суух хугацаа нь дуусахад хараар амьдарч, ажиллаж буй барилгынхаа хашаанаас өдрийн цагаар хамраа ч цухуйлгаж чаддаггүй. Инээдтэй ч гэмээр нэгэн жишээ дурьдахад хип хоп "Татар" хамтлагынхан нэгэн уран сайхны кинонд тоглосон. Зураг авалтаа Баянзүрх дүүрэгт буюу “Гэрэл” төвийн барилга баригдаж буй газрын хажууд хийжээ.
          Цагдаагийн хувцас өмссөн жүжигчдийг харсан хятад барилгачид хулхи нь бууж, оромж руугаа гүйлдэн, хаалга цонхоо хаагаад таг болсон удаатай. Энэ мэтчилэн нууцаар оршин суух хятад иргэд элдэв төрлийн зөрчилд холбогдож, барилга дээр ажиллаж буй монгол ажилчид ч тэдэнтэй нийлж танхайрах явдал хэрээс хэтрэх болсон. Иймд Гадаадын иргэн, харьяатын асуудал эрхлэх газраас манай улсад оршин суугаа гадаадын иргэдийн дунд өнгөрөгч долоо хоногт шалгалт хийсэн байна. Шалгалтад БНХАУ-ын 500 гаруй иргэнийг хамруулснаас 80 гаруй хувь нь буюу 400 гаруй хятад иргэд баривчлагджээ.
        Энэ талаар Гадаадын иргэн, харьяатын асуудал эрхлэх газрын Удирдлагын хэлтсийн дарга Н.Энх-Эрдэнээс тодруулахад "Манай байгууллага жил бүр гадаадын иргэдийн дунд шалгалт явуулдаг. Түүний дагуу өнгөрсөн долоо хоногт хийсэн шалгалтын явцад "Алтай констракшн"-ий "Бати Шин Дун" барилгын компаниас 68, "Эко констракшн"-ий "Маршал таун" барилгаас 27, "Шилмэл шилтгээн"-ий барилгаас 120, "Зун Шин" барилгын компаниас 50, "Түшиг" их дэлгүүрийн барилгаас 18, "Энх үйлсийн иргэн" барилгаас 130, "Тэнгэр Лид" компаниас 22, Арслантай гүүрний хажууд баригдаж буй барилгаас 76, "Лаки" төвийн баруун талд баригдаж буй барилгаас 13 хятад ажилчин оршин суух зөвшөөрөлгүй, ажлын байрны төлбөр төлөөгүй байсан нь тогтоогдсон байна. Одоо 400 гаруй хятад ажилчин саатуулагдаад байна.
        Мөн Улаанбаатараас Шарга-морьтын зуслан руу жижиг оврын микроавтобусаар олон тооны хятад иргэд зөөж байна гэх мэдээллийн дагуу шалгахад БНХАУ-аас манай улсад хууль бусаар орж ирээд удаагүй 45 хятад иргэн байсан ба тэдгээрийн 10 нь биедээ ямар нэг бичиг баримтгүй явсныг илрүүлсэн. Ингээд саатуулагдсан БНХАУ-ын иргэдийг хэсэг болгон хуваагаад нутаг буцаах ажил өнөөдрөөс эхэллээ" гэв. Ийнхүү баривчлагдсан хятадуудыг Монгол Улсын нутаг дэвсгэрт 24 цаг байлгадаггүй журмын дагуу БНХАУ-ын иргэдийн эхний цуваа болох 80 гаруй хүн өчигдөр Улаанбаатар-Бээжингийн чиглэлийн 16.00 цагийн галт тэргээр нутаг буцлаа.