Барилга, хот байгуулалтын яам, Улаанбаатар хот болон БНСУ-ын Сокчу хотын хамтын ажиллагааны хүрээнд Налайх  дүүрэгт барилга, аж үйлдвэрийн  цогцолбор  барихаар болжээ. Монгол Солонгосын хамтарсан хөрөнгө оруулалттай  “Соён зуун хөгжил” компани уг  ажлыг хийж  гүйцэтгэх гэнэ. Барилгын хана, тоосго, хавтан, зуурмаг, шил, цемент, модон эдлэл, цахилгааны хэрэгсэл зэрэг  барилгын материалын 30 гаруй  үйлдвэрийг барих аж. Мөн цогцолборыг байгуулснаар 10-15мянган ажлын  байр шинээр  бий болох юм байна. Түүнчлэн таван мянга гаруй  айлын орон сууц, хүүхдийн  цэцэрлэг, сургууль барихаар  төлөвлөжээ. Уг ажлыг  эхлүүлснээр  Монгол улсын засгийн газраас хэрэгжүүлж буй “40 мянган айлын орон сууц хөтөлбөр” УИХ-аас  саяхан батлагдсан “Барилгын  материалын  үйлдвэрийг  хөгжүүлэх мастер төлөвлөгөө”-г бодитоор хэрэгжүүлэхэд  чухал ач холбогдолтой. Мөн “Их бүтээн байгуулалт шинэ ажлын байр нэмэгдүүлэх жил”ийн хүрээнд хийгдэж байгаа томоохон хөрөнгө оруулалт гэнэ.