Зам засварын ажлын явцын талаар Нийслэлийн автозамын газрын Зам барилгын хэлтсийн дарга Г.Баттогтохоос тодрууллаа.

-Нийслэлийн хэмжээнд хэчнээн зам засвартай байна вэ?
-Зам, гүүрийн барилга, засварын ажлууд өрнөж байна. Дамдинсүрэнгийн гудамжны 0.9 км замын хашлага суурилуулах ажил дуусаад, бетон цутгаж байгаа. Энэ ажил удахгүй дуусна. Үйлдвэрчний эвлэлийн гудамжны 1,4 км, Чингэлтэйн эцсээс Зүрх уул чиглэлийн 1.8 км, Хайлааст Чингэлтэйг холбосон 1.5 км замын ажил хийгдэж байна, Хотын хэмжээнд 10 гаруй замд засвар хийгдэж байгаа.

-Хэзээ дуусах бол?
-Ирэх сарын 30 гэхэд дуусгах төлөвлөгөөтэй. Замын ажил цаг агаартай шууд холбоотой, юу юугүй цас ороод хүйтэрчихгуй бол ажлаа хугацаандаа дуусгана, Чингэлтэйн эцсээс Зүрх уул хүртэлх, Хайлааст Чингэлтэйг холбосон замын ажил хамгийн сүүлд үлдэх байх, Мөн Нарангийн голын 3.2 км зам, Баруун дөрвөн замаас X хороолол хүртэлх замын барилга ирэх сарын сүүлчээр дуусна.

-Хотын хэмжээнд зам засварын ажил хэдэн хувьтай байна вэ?
-70 орчим.

-Олимпийн гудамжны замын засвар энэ зуны ажлын бараг эхнийх нь байсан. Гэтэл өнөөг хүртэл гараас гардаггүй?
-Ажил цаад талдаа эрчимтэй явж байна. Харин Маршалын гүүрнээс Олимпийн гудамж хоорондох 470 метр газрыг айлууд нь чөлөөлөхгүй гацаанд оруулаад байгаа. Ийм шалтгаанаас болоод удааширч байгаа ажил хэд хэд бий.

-Замын ажил заасан хугацаанаасаа хоцорч буй иргэдийг бухимдуулж байгаа?
-Зам барихад барилгын ажлаас гадна олон хүчин зүйл саад болж байна л даа. Замын талбайд орсон айлуудыг нуүлгэх асуудал бүх зам дээр гарч байгаа. Үүнээс гадна замын доогуурх инженерийн шугам сүлжээг нүүлгэх хэрэгтэй. Замын ажлын төсөвт цахилгааны шугамыг нүүлгэх хөрөнгө тусгаагүй.

-Замын чанарт хэр анхаарч байна. Токиогийн гудамжийг 2006 онд шинээр барьсан. Гэтэл сая дахин засварлалаа?
-Замын чанарт хяналт тавих инженерүүдийг энэ жил нэмж авсан. Мөн дөрвөн автомашинтай боллоо. Чанарын хяналтыг сайн хийж байгаа. Зам барилгын компаниуд туршлагажсан, хүн хүч сайтай болсон.