Дани улсын нийслэл Копенгаген хотноо “Index-2007” үзэсгэлэн-уралдаанд оролцогчдод шагнал гардуулах ажиллагаа 2007 оны 8 сарын 24-нд болж өнгөрчээ. Таван ялагч тодруулсан бөгөөд тус бүрдээ 100 000 еврогийн шагнал хүртжээ.

“Бие” /буюу “Хүн”/ гэсэн төрөлд Канадын дизайнер Себастьян Дюбуа “Бүхний төлөө” гэсэн уриа бүхий ажлаараа дээд шагналыг хүртжээ. Жилд барагцаагаар 25000 хүн минаны улмаас хөлгүй болдог ажээ. Дэлхий даяар олон зуун мянган хүнийг идэвхитэй амьдрахад нь туслах чанартай протез хэрэгтэй байгаа. Өнөө үед чанар сайтай протезийн үнэ 1300-с 4000$-ын хооронд байгаа нь хэн хүссэн хүн худалдан авч чадахгүйд хүргэж буй юм. Index-2007-д Себастьян Олон улсын улаан загалмай нийгэмлэгийн наад захын шаардлагыг хангахуйц чанартай, хямд үнэтэй протезийн хэд хэдэн загварыг дэлгэн тавьсан байна. Түүний тооцоогоор протезийг бөөнөөр үйлдвэрлэхэд нэгжийн өөрийн өртөг нь ердөө 8 $ болох аж. Уг протезийг хаа ч, хамгийн элбэг байдаг материалаар /хоёрдогч түүхий эдээр / үйлдвэрлэж болох гэнэ.

“Ажил” гэсэн төрөлд нэгдүгээр байрыг Филип Грир, Лиза Стру, Грем Девис, Крис Хантли нар эзлэжээ. 2005 оны 6 сард Лондонд болсон террорист халдлага Хааны урлагийн коллежийг төгссөн дөрвөн дизайнер залуугийн анхаарлыг татсан байна. Тэдний бүтээл болох “хэлний угж” нь аврах албаныханд зориулагджээ. Энэхүү бяцхан багаж нь террорист халдлагад өртсөн хүний хэлийг хоолойд орохоос хамгаалдаг бөгөөд хиймэл амьсгаа хийж, авран хамгаалахад онцгой тусладаг багаж ажээ. “Хэлний угж” нь тод өнгө бүхий бөмбөлгөн резин бөгөөд тусгайлан бэлтгэгдээгүй хэн боловч хэрэглэх зарчмыг нь хялбархан ойлгохуйц тайлбарыг хайрцаган дээр нь тэмдэглэсэн байдаг байна.

“Тоглоом” төрлийн шагналыг Элон Маск /Tesla Motors компаний захирал/, Мартин Эберхард /Tesla Motors компаний гүйцэтгэх захирал/, Барни Хатт /Lotus Design Studio-н стилист/ нарын хүмүүс хүртсэн байна. Родстер Tesla бол 4 секундын дотор 100км/цагийн хурд хийх орчин үеийн цахилгаан автомашин/электромобиль/ ажээ. Родстер нь 200 миль/320 км/ -с багагүй зайг цагт туулах чадвартай, нийтэд зориулан үйлдвэрлэж байгаа анхны цахилгаанаар явдаг автомашин юм. Хөдөлгүүрийн ашигт чанар нь 135 миль замд нэг галлон бензин зарцуулдаг хөдөлгүүртэй адил /100 км-т ердөө л 1.7 литр гэсэн үг/ аж. Аккумуляторыг нь цэнэглэхэд 3.5 цаг зарцуулна. Мөн нэг миль замд нэг Америк центийн зардал гаргана гэсэн тооцоолол хийсэн байгаа нь эдийн засгийн хувьд хэмнэлттэй болгож байгаа болно.
Харьцангуй хямд үнэтэй зах зээлийн орон зайш эзлэх гэсэн ердийн аргаас ялгаатай нь Tesla Roadster зах зээлд байр сууриа аль хэдийнэ эзлэсэн элитүүдтэй шууд өрсөлдөхийг эрмэлзэж байгаа гэнэ. Компани мөн 2010 он гэхэд спорт загварын суудлын автомашин үйлдвэрлэхээр төлөвлөсөн байна.

Харин “Харилцаа холбоо” төрлийн ялагчаар Ребекка Аллен, Кристофер Близзард, Михаэль Бове, Ив Беар, Уолтер Бендер, Михаил Блетсас, Марк Фостер, Жак Гань, Мэри Луи Жепсен, Николас Негропонте, Лиза Штраусфельд нарын 11 залуу тодорсон байна. Тэдний зохион бүтээсэн OLPC XO компьютерт нь шагнал олгосон бөгөөд OLPC гэдэг нь «One Laptop Per Child» буюу “Нэг хүүхдэд нэг компьютер” гэсэн үгийн товчлол аж. Эдгээр зохион бүтээгч залуусын ахлагч Николас Негропонте “100 долларын компьютер” хэмээх алдартай санаачлагыг гаргасан хүн юм байна. Түүний гаргасан санал санаачлага нь ихээхэн хүчин зүтгэл гаргасны үр дүнд ажил хэрэг болсон ба ийм компьютер зохиох болсон нь хүүхэд болоод буурай хөгжилтэй орны иргэдийг тоон технологийн эринд хамтдаа алхан орох боломжийг олгоход чиглэсэн байв.

Төслийг ажил хэрэг болгох үүднээс нэг саяаас багагүй компьютерийг үйлдвэрлэх болон баталгаатайгаар борлуулах тал дээр олон хүмүүстэй яриа хэлэлцээр хийх шаардлагатай тулгарч байсан ч одоо саад бэрхшээл ерөнхийдөө үгүй болж ХО үйлдвэрлэгдэж эхэлсэн боловч зуун долларын хэмжээнд бууж чадаагүй л байгаа юм. ХО төрлийн дараагийн компьютерүүдэд Intel корпорацийн боловсруулсан төслийг хэрэглэх бөгөөд ингэснээр анх зарлаж байсан 100 ам.долларын үнээр зарагдаж эхлэнэ гэсэн яриа ч явж байгаа юм байна. Төсөлд оролцогч орнуудын засгийн газраар дамжуулан “Нэг хүүхдэд нэг нөүтбүк” гэсэн зарчмаар 135-175 ам.доллараар анхлан худалдах ба 2008 он гэхэд 100 ам.доллар хүртэл буурах ёстой ажээ. 2007 оны дунд үеэс бүрэн хэмжээгээр үйлдвэрлэж эхэлсэн уг нөүтбүкийг үйлдвэрлэгч Quanta Computer нэг сая компьютерийн захиалгатай байгаа, мөн Аргентин, Бразил, Ливи, Нигери, Руанда, Таиланд, Уругвай улсын сурагчдад зориулан жилд 5-с 10 сая нөүтбүк үйлдвэрлэнэ хэмээн хэмээн мэдэгдсэн байна.

Эдгээр таван номинацаас гадна үзэгчдийн талархлыг хүлээсэн бүтээлийн шагналыг олгожээ. Ялагчаар Вьетнам гаралтай Данийн дизайнер Хан Фам «Антивирус» бүтээлээрээ шалгарсан байна. «Антивирус» нь тариур ашиглан хийсэн савны нэг удаагийн хамгаалах бөглөө ажээ. Хан Фамын ярьснаар бол энэ бүтээлийн санаа нь Сингапур дахь дүрвэгсдийн хуаранд өнгөрүүлсэн түүний амьдралаас үүдэлтэй гэнэ.

Дээрхи шалгаран шагнал авсан хүмүүс бүгд нийгэмд чиглэсэн үйл ажиллагаа явуулж байгаа нь харагдаж байгаа бөгөөд Tesla компанийн жишээнээс харахад тун ойрын ирээдүйд үр ашиг өндөртэй, байгальд халгүй автомашин олон нийтэд зориулагдан гарах боломжтой байгаа нь харагдаж байна.