Казахстан улсын ерөнхийлөгчийн ордонг 2001 оны 9 сараас нийслэл Астана хотын засаг захиргааны шинэ төвийн нутаг дэвсгэр дээр Ишим голын зүүн эрэгт барьж эхэлжээ. Нийт 36 720 м2 талбайг эзлэн орших ерөнхийлөгчийн ордонг 2004 оны 12 сарын 24-нд албан ёсоор нээсэн байна. Тус барилгыг барилга угсралтын хамгийн дэвшилтэт арга технологийг ашиглан цутгамал бетоноор барьжээ. Ордон нь дээд ганжиртайгаа нийлээд 80 м өндөртэй бөгөөд гадна өнгөлгөөг нь 20-с 40 см зузаантай Итали гантигаар бүржээ. Газар доор хоёр, газар дээр 5 давхар бөгөөд нэгдүгээр давхарын өндөр нь 10 м, бусад давхарын өндөр нь 5 м ажээ.  Доод зоорийн давхарт нь техникийн алба, гал тогоо  болон хооллох өрөө, гарааж байдаг байна.

Нэгдүгээр давхарт нь боржин шалтай 1800 м2 талбай эзлэн орших жагсаалын төв танхим байна. Үүний зэрэгцээ, тус давхарт:

• Казахстан улсын ерөнхийлөгчийн нэрийн өмнөөс албан ёсоор явуулах ёслолын ажиллагааны танхим
• Казахстан улсын ерөнхийлөгчийн хэвлэлийн бага хурлын танхим, хэвлэл мэдээллийн төлөөлөгчидтэй уулзах танхим
• Өвлийн цэцэрлэг байна.

Хоёрдугаар давхарт албан өрөөнүүд байрлана.

Гуравдугаар давхарт:

• Гантиг боржингоор чимэглэсэн, гэр хэлбэрийн Дорно дахины загвартай танхим
• Гантиг танхим /Гадаад улсуудын төрийн албан сны төлөөлөгчид ирэхэд баримт бичигт гарын үсэг зурж, сэтгүүлчдийн асуултад хариулахад, мөн Казахстан улсад суух гадаадын элчин төлөөлөгчид итгэмжлэх жуух бичгээ барих, Казахстан улсын төрийн шагнал, хүндэт цолоор шагнаж урамшуулах, Казахстан улсын ерөнхийлөгчийн оролцоо бүхий бусад улсын шиж чанартай арга хэмжээг зохион байгуулах үйл ажиллагаа болно./
•  Алтан танхим /Казахстан улсын ерөнхийлөгч гадаад улсуудын тэргүүнүүд буюу засгийн газартай уулзалт хийж ярилцана/
• Зууван танхим /Казахстан улсын болоод гадаад улсуудын дээд албаны төлөөлөгчид уулзалт хийх, Төрийн тэргүүн гадаадын төлөөлөгчид болон ажил хэргийн хүрээний хүмүүстэй уулзана/
• Зочлох өрөө /Казахстан улсын ерөнхийлөгч итгэмжлэх жуух бичгээ өргөн барисаны дараа гадаад улсуудын элчин сайдуудтай ярилцана/
• Өргөн хүрээний хэлэлцээр хийх танхим /Казахстан улсын болон гадаад улсуудын дээд албаны төлөөлөгчид хэлэлцээр хийнэ/
• Аюулгүй байдлын зөвлөлийн танхим /Казахстан улсын аюулгүй байдлын зөвлөлийн хуралдаан явагдана/
• Албан өрөөнүүд болоод мэдээлэл хийх танхимууд байрлана.

Дөрөвдүгээрт давхарт:

• Дугуй танхим /Казахстан улсын ерөнхийлөгч тус улсын дээд албаны хүмүүстэй уулзалт хийхэд зориулсан бөгөөд яам, үйлдвэрийн газар, нам хөдөлгөөн, уран бүтээлийн болоод ажил хэргийн хүрээний хүмүүстэй, мөн Казахстан улсын ерөнхийлөгчийн дэргэдэх зөвлөлдөх байгууллагуудтай хийх зөвлөгөөн энд явагдана/
• Хурлын танхим /Казахстан улсын ерөнхийлөгч тус улсын засгийн газар, ерөнхийлөгчийн засаг захиргааны доод шатны удирдлагууд, мужуудын болон Алматы, Астана хотын аким/захирагч/-ууд, яам, үйлдвэрийн газруудын удирдлага, уран бүтээлийн болоод ажил хэргийн хүрээний хүмүүстэй уулзалдана/
•  Хэлэлцээрийн танхим /Казахстан улсын ерөнхийлөгч тамгын газрын дарга, ерөнхийлөгчийн туслахууд гадаадын төлөөлөгчидтэй уулзалт хийнэ/
• Номын сан
• Албан өрөөнүүд байрлана.
  

Бүх танхимуудыг тансаг зэрэглэлийн гоёл чимэглэл, гэрэлтүүлэг, тавилгатай. Шалыг нь янз бүрийн гантиг, боржин, хиймэл паркетаар өнгөлжээ.
Казахстан улсын ерөнхийлөгчийн өргөөг барихад дэлхийн томоохон үйлдвэрлэгчдийн тэргүүний инженерийн тоног төхөөрөмжийг ашигласан байна.