38-ын "б" байранд уржигдар 11.30 цагийн үед болсон энэ золгүй явдлын талаар оршин суугчид ингэж ярилаа. "Манай байрны дээд талд наймдугаар сараас эхлэн мансард барьж эхэлсэн юм. Ямар компани гэдгийг нь мэдэхгүй. Уржигдар үдийн үед гуравдугаар орцны жижүүр Алтанхуяг, энэ байруудыг хариуцдаг орон сууцны компанид сантехникийн туслах слесариар саяхан ажилд орсон Зоригтбаатар нар тус орцны үүдэнд ярилцаад сууж байсан юм. Гэтэл гэнэт дээрээс нь төмөр торх унаад, тэднийг цохисон. Орцны үүдний саравч таараагүй бол тэдний амь насанд аюул учрах ч байсан байж болзошгүй. Саравч тээглэснээр торх Алтанхуягийн нуруун дээр унаж, дараа нь Зоригтбаатарыг оносон гэв.
        Барилгын компанийн талбайн инженер Цэцгээ гэдэг хүнтэй уулзаж ослын талаар болон гэмтсэн хүмүүсийн эмчилгээний зардлыг хэрхэх талаар тодруулахыг зорьсон боловч "Юу ч хэлэхгүй" гээд хашаа руугаа орчихов. Энэ нь мансард барих төслийг хэрэгжүүлэгч "NSL" компанийн гүйцэтгэгч "Клистон" гэдэг компани гэнэ.
        38 дугаар байрны дээр тус компанийнхан хамгаалалт, аюулгүй байдлыг хангахад зориулсан нимгэн тор татсан харагдана. Өөрийн үндсэн жин нь 35 кг, өмнө нь хар тос шатааж байгаад үлдэгдэл нь наалдсан, бага зэрэг устай торхыг уг тор яагаад ч даахааргүй харагдсан. Оршин суугчдын өгүүлж буйгаар, өмнө нь нэг бус удаа тоосго унаж байсан нь азаар хүн оноогүй гэнэ. Барилгын ажилчид өрлөг хийхдээ хоёр торх давхарлан ашиглаж байтал гэнэт холбирсноос ийм золгүй явдалд хүргэжээ. Энэ үеэр гэмтсэн Алтанхуягийг Гэмтэл согог судлалын үндэсний төвд хэвтүүлэн эмчилгээ хийж байгаа аж.
        Харин туслах слесарь Б.Зоригтбаатарыг хөдөлгөөнгүй байлгах шаардлагатай гэсэн атлаа эмнэлэгт хэвтүүлээгүй байв. Хэл амтай барьж байгаа мансардууд хүний аминд хүрэхэд ойрхон байгааг энэ явдал харуулж байна. Тиймээс барилгын компаниуд барьж, засварлаж буй барилгынхаа аюулгүй байдлыг сайтар хангах талаар анхаарах, барилгын ажил хийж байгаа газрын ойролцоо иргэд анхаарал сэрэмжтэй явах хэрэгтэйг хууль хяналтын байгууллагынхан санууллаа.