“Номын Соёлт Ертөнц ТББ” болон UBS телевизээр үзэгчдэд хүрдэг “Номын Ертөнц” нэвтрүүлгийн уран бүтээлчид зохион байгуулдаг үндэсний хэмжээний “НОМЫН БАЯР” 9 дэх удаагаа болох гэж байна.
Энэ жил Монголын Тулгар Төр Улс байгуулагдсаны 2220 жилийн ой, Их Монгол Улс байгуулагдсаны 805 жилийн ой, Үндэсний эрх чөлөөний хувьсгалын 100 жилийн ой, Ардын хувьсгалын 90 жилийн ой, Ардчилсан хувьсгалын 20 жилийн ой гээд тэгш ой давхцаж байгаа.

Үүнтэй холбогдуулан үндэсний хэмжээний 9 дэх удаагийн “Номын баяр”-ыг ТҮҮХТ ОЙ- ТҮҮХЭН БҮТЭЭЛ уриан доор тэмдэглэхээр боллоо.

“Номын баяр” нь Монголын ном хэвлэлийн салбарын хамгийн өргөн цугларалт болдог. Зөвхөн баярын өдрүүдэд зориулан ном хэвлэлийн байгууллагууд, ном эрхлэн гаргагчид өөрсдийн бүтээлээ 10-50%-аар хямдруулан худалдаалж уншигчдыг баярлуудаг. Мөн зохиолчийн гарын үсэгтэй худалдаа,  ховор номын худалдаа, уншигч зохиолчийн уулзалт, номын нээлт зэрэг номын эргэн тойронд олон сайхан арга хэмжээ зохион байгууллагддаг.

Жил жилийн “Номын баяр” өөр өөрийн гэсэн онцлогтой болдог. Энэ жилийн ШУА-ийн Түүхийн хүрээлэнгийн эрдэмтэн судлаачид баярын гурван өдрүүдэд түүхийн бүтээл танилцуулж, сонирхолтой зурагт лекцийг уншиж, уншигчдын асуултанд хариулна. Мөн тэгш таван ойтой холбогдуулсан үзэсгэлэн гарах бөгөөд түүхийн, болон архивын зарим бичиг баримтыг дэлгэн үзүүлнэ.