Орон сууцны хорооллын дунд гараж, авто зогсоол ашиглагч иргэн, аж ахуйн нэгж байгууллагуудын дэмжлэгтэйгээр зураг төсөл, төлөвлөлтгүй, эмх замбараагүй баригдсан төмөр болон тоосгон гаражуудыг буулган газар эзэмшил, ашиглалтын нягтралыг сайжруулж, хүүхдийн тоглоом, амралтын талбай бүхий газар доогуур гараж барих ажлыг үе шаттайгаар хэрэгжүүлэхээр төлөвлөөд байна. Хотын төвийн дүүргүүдэд нийт 30 байршилд хүүхдийн тоглоомын талбай бүхий авто машины давхар гараж байгуулахаар төлөвлөсөн. Үүнээс эхний ээлжинд төвийн зургаан дүүрэгт давхар гаражийн эскиз зураг хийж дууссан бөгөөд одоогоор ажлын зураг боловсруулахад бэлэн болоод байгаа юм. Тухайлбал Баянзүрх дүүргийн 18-р хороо Дамдинсүрэнгийн гудамжны орчим, Баянгол дүүрэгт 86-р цэцэрлэгийн хойд талд, Сүхбаатар дүүргийн 5-р хороо Саруул төвийн хойно, Чингэлтэй дүүргийн Чандмань төвийн зүүн хойд талд, Хан-Уул дүүргийн 19–р хорооны нутаг дэвсгэрт, Сонгино хайрхан дүүрэгт Глоб төвийн хойд талд эхний ээлжинд давхар гараж баригдана.