Улаанбаатар хотод эрүүл мэндийн анхан шатны тусламж үйлчилгээ үзүүлж байгаа 1300 гаруй өрхийн эмч, сувилагч нарыг баярлуулсан үйл явдал өнөөдөр болов.  Нийслэлийн Засаг даргын санаачлагаар зохион байгуулсан “Эрүүл мэндийн анхан шатны тусламж үйлчилгээний чанар хүртээмжийг нэмэгдүүлье”  зөвлөгөөн дээр өрхийн эмч нарыг орон сууцны хөтөлбөрт хамруулах гэрээнд гарын үсэг зурсан юм. Орон сууц санхүүжилтийн корпорацийн захирал Ж.Алдаржавхлан,  Нийслэлийн эрүүл мэндийн газрын дарга С. Туул, Монголын өрхийн эмнэлгүүдийн холбооны тэргүүн Ц. Ганхүү нар гурвалсан гэрээнд  гарын үсэг зурснаар орон байрны нөхцлөө сайжруулах хүсэлтэй өрхийн эмч, эмнэлгийн ажилтнуудад  100.000 айлын орон сууц хөтөлбөрт хамрагдах боломж нээгдсэн гэсэн үг. Эхний  ээлжинд Нийслэлийн Засаг даргаас олгосон квотын хэмжээнд 8 хувийн хүүтэй зээлд хамрагдах боломжтой.  Харин 10 дугаар сарын эхээр орон сууцны зээлийн санхүүжилтийн эх үүсвэрийг Үндэсний хороогоор батлах үед  6 хувийн хүүтэй,  25 жилийн хугацаатай  зээлд хамрагдах юм гэдгийг ОССК-ийн захирал Ж. Алдаржавхлан тэдэнд дуулгав.