Нийслэлийн Засаг даргын захирамжаар дүүргүүдийн ажлыг шалгах ажлын хэсгийг томилоод байна. Ажлын хэсгийг нийслэлийн Засаг даргын орлогч Б.Баатарзориг ахалж байгаа. Тус ажлын хэсэг нь "Худалдан авах ажиллагааны эрхийг дүүргийн Засаг дарга нарт шилжүүлсэн төсөл, арга хэмжээ, барилга байгууламжийн ажлыг дүүрэгтэй хэрхэн зохион байгуулан хэрэгжүүлж байгааг шалгах юм. Өөрөөр хэлбэл улс, Нийслэлийн хөрөнгө оруулалтаар хийгдэж байгаа болон хийгдэх ажлын хэрэгжилт, явц, сонгон шалгаруулалтад  дүн тавина гэсэн үг. Шалгалт өчигдөр Сүхбаатар дүүргээс эхэллээ.

-Ерөнхий боловсролын сургуулийн 15 сургуульд нийт 233.9 сая төгрөгийн хөрөнгө оруулалт хийгдсэн, Ажлын явц 91.1 хувьтай байна. Засварын ажил бүрэн дуусаагүй ч хичээлийн шинэ жилд нөлөөлөөгүй. Харин хөрөнгө оруулалт хийгдсэн цэцэрлэгүүдийн засвар 92 хувийн биелэлттэй байна. Зам

засварын тухайд нийслэлийн хөрөнгө оруулалтаар хороолол дундах авто замын засварын ажлыг гүйцэтгэхээр "Үнэлгээний хороо" ажиллаж нийт 17 багц зам засварын ажилд тендер зарлаж, шаардлага хангасан долоон багц ажлын гүйцэтгэгчийг шалгаруулсан.
    Үлдсэн арван газрын гэрээг нийслэлийн Авто замын газар бие даан шалгаруулсан. Дүүргийн сонгон шалгаруулсан гурван багцын зам засварын ажлыг "Тотал инж" компани гүйцэтгэх хэдий ч өнөөдрийн байдлаар ажил нь эхлээгүй.   Дүүргийн зүгээс удаа дараа шаардлага тавьж, ажлаа яаралтай   эхлүүлж, дуусгахыг   хүссэн   ч   дээрх компани  бид өөр ажилтай, тэрнийгээ   дуусгаад   хийнэ гэсэн тайлбар өгдөг. Бусад зам засварын ажил дууссан. Нийслэлийн Засаг даргаас дүүргийн Засаг даргад худалдан авах ажиллагааны эрх шилжих болсноор хөрөнгө оруулалт, засварын ажлын гүйцэтгэлийг шалгаруулахад сайн,  муу үр дагавар  гарч байна. Сайн тал нь хийгдэх ажлыг иргэдийн санал хүсэлт дээр тулгуурлан хийх болсон. Мөн гүйцэтгэх талд шаардлага тавихад хүлээж авах, хяналт хариуцлагын  тогтолцоо сайжирч байна. Тендерт шалгарсан компаниуд ажлаа 100 хувь өөрсдийн санхүүжилтээр хийсэн, ажлаа дуусчихаад хоёр сар болж байхад улсын комисс хүлээн аваагүй. Дээрх тохиолдолд орон нутгийн захиргааны байгууллагад итгэх итгэл болон нэр хүнд буурах явдал гарч байна. Нийслэлийн Хөрөнгө оруулалтаар хийгдсэн ажлын гүйцэтгэлийг хүлээн авах улсын комисст дүүргийн төлөөлөл байдаггүй. Дүүргүүдийн үнэлгээний хорооны нарийн бичгийн дарга нь нэг хүн байгаа нь цаг хугацаа алдахад нөлөөлж байна хэмээн ярилаа. Энэ жилээс зам засварын ажлыг иж бүрэн хийж байна. Замыг борооны ус зайлуулах шугам сүлжээ, явган хүний зам, гэрэлтүүлэгтэй хийж байгаа.
    Дамбадаржаагийн шинэ эцсээс Бэлхийн чиглэлийн 2.2 км замд хатуу хучилт нь тавигдах юм байна. Учир нь энэхүү зам засварын хөрөнгө нийслэлээс бус ЗТАЖЯ-наас гарч байгаа аж. 2006 онд энэхүү замыг засварлахаар болж зураг төслийг нь "Мон инж бар" компани хийхдээ зөвхөн сайжруулсан зам тавихаар боловсруулжээ. Ирэх оны төсөвт уг замыг иж бүрэн засварлах асуудлыг оруулах бололтой.
    УИХ-ын тойрогт хийгдэх хөрөнгө оруулалтын ажил тус дүүрэгт эхлээд байна. УИХ-ын гурван тойрогт 250 сая төгрөгийн хөрөнгө оруулалт хийгдэх аж. Энэхүү мөнгийг нийт 18 ажилд зориулна. Тухайлбал, дүүргийн 1-9 дүгээр хороонд ахмадын танхимыг байгуулна. 1-5 дугаар   хорооны   хороолол доторх замыг тус бүр 20 сая төгрөгөөр сайжруулах, мөнгө гэрэлтүүлэгт ч тодорхой хэмжээний хөрөнгө зарцуулна. 15 дугаар хороонд эмчилгээ оношлогооны төвийг байгуулжээ. Мөн 75 дугаар цэцэрлэгийн өргөтгөлийн барилга баригдана.
    Энэ онд төлөвлөсөн ажлуудаас нь тус сургуулийн өргөтгөлийн барилга нь он дамжин хийгдэхээр байгаа аж. Дүүргийн хувийн хэвшлийн байгууллагууд гадна тохижилттой анхаарахдаа тун хойрго ханддаг байна. Хүүхдийн урлан бүтээх төвийн хашаанд баригдаж байгаа барилгын эзэд явган хүний зам руу хаяагаа тэлжээ. Дүүргийн зүгээс уулзах гэхэд эрх мэдэлтнүүд нь олдоггүй гэнэ. Ямар ч байсан Сүхбаатарчүүд аман шалгалтандаа тэнцлээ. Шалгалтыг хоёр үе шаттай явуулж байна. Эхнийх нь дүүрэгт хийгдэж байгаа ажлуудын талаар удирдлагуудынх нь үнэлгээг мэдэх явдал. Харин хоёр дахь нь бичиг баримтын шалгалт. Нийслэлийн Хөрөнгө оруулалтын газраас мэргэжилтэн томилогдож бичиг баримтын шалгалтыг явуулна.