Дархан цаазат Богд хан ууланд сул газар гэж байхгүй боллоо. Ам болгонд аялал жуулчлалын бааз бий болж, Туулын хөвөөгөөр орон сууцууд олноороо баригдах болсон. Хан-Уул дүүргийн 11 дүгээр хорооны нутаг дэвсгэрт Н.Цоггэрэл захиралтай  "Бат бөх" ХХК зургаан давхар хоёр барилга барьж байна. Тус компани 2003 онд Байгаль орчны яамнаас аялал жуулчлалын зориулалтаар хоёр давхар барилга барих зөвшөөрөл авчээ. "Бат бөх" компанийн балгаар 11 дүгээр хорооны Тавдугаар хэсгийн 22 өрх газраасаа хөөгдөх болоод байна. Өнгөрсөн сарын 16-нд нийслэлийн Шүүхийн шийдвэр гүйцэтгэх газрын хүмүүс "Хуяг-Очир" хамгаалалтын албаныхантай ирж дээрх 22 айлыг хүчээр нүүлгэх гэж оролджээ.
    Тус компанийнхан гудамж руу хашаагаа шахан барьж, зарим эзэнгүй байсан айлын хашаа, гэрийг нь нураасан байна. Баригдаж дуусаагүй байгаа барилгад нь хятад ажилчид болон харуул нь амьдардаг аж. Газраасаа хөөгдсөн иргэд "Цэлмэг Зайсан" иргэдийн хөдөлгөөнийг зохицуулах хороо байгуулжээ. Тэд 61 дүгээр тойргоос сонгогдсон УИХ-ын гишүүн Н.Баяртсайханд хандсан байна. Н.Баяртсайхан гишүүн Байгал орчны асуудал эрхэлсэн сайдад албан тоот илгээсэн ч өнөөг хүртэл шийдвэр гараагүй байгаа гэнэ.
    Энэ талаар иргэдийн хөдөлгөөнийг зохицуулах хорооны гишүүн З.Доржготовоос тодруулахад, "Бат бөх" компанийнхан энд барилга барьж эхэлснээс хойш бид тайван амьдрах боломжгүй болсон. Дүүргийн Засаг дарга Д.3агджав, УИХ-ын гишүүн Н.Баяртсайхан, Байгаль орчны яаманд удаа дараа хандаж байсан. Харин Н.Баяртсайхан гишүүн "Та нар нүүхгүй. Шүүхийн шийдвэрийг хүчингүй болгосон. Тайван байж болно" гэсэн хариултыг өгсөн. Гэтэл "Бат бөх" компани ажлаа зогсоохгүй, шөнийн цагаар барилгаа барьж байна. Энд 10-40 жил амьдарсан хүмүүс байдаг. Газраа хувьчилж авах гэж их хөөцөлдсөн. Гэвч дархан цаазтай газар гээд ер халгаагаагүй гэлээ.