Уралдааны зорилго: Гэр бүлийн хэрэгцээний зориулалтаар газар үнэгүй өмчлөн авч, газар өмчлөх эрхээ баталгаажуулсан нийслэлийн иргэдийн 73.5 хувь, хөдөө орон нутгийн иргэдийн 20.2 хувь нь өмчийн газраа худалдаж, арилжаалсан, газраа барьцаалан зээл авах хэлбэрээр эдийн засгийн эргэлтэд оруулж өмчилсөн газрынхаа үр шимийг хүртсэн байна.

Уралдааны зорилго нь орон нутгийн иргэдийн газар өмчлөх, газраа эдийн засгийн эргэлтэд оруулж үр шимийг нь хүртэх сонирхлыг өдөөх, ажлын байр нэмэгдүүлэх боломжийг өргөжүүлэх, газрын үр шимийг хүртсэн нийслэлийн иргэдийн бодит туршлагыг орон даяар сурталчлахад оршино.

Уралдаанд оролцогч: 2003-2011 онд нийслэлийн нутаг дэвсгэрт гэр бүлийн хэрэгцээний зориулалтаар газар үнэгүй өмчлөн авсан, өмчилсөн газрынхаа үр шимийг ямар нэгэн хэлбэрээр хүртэж, энэ талаар бусдад үлгэрлэх, үйл ажиллагаагаа сурталчлахыг хүсэгч нийслэлийн иргэн бүр уралдааны оролцогч болох боломжтой. Газар болон хөдөлмөрөө хоршин, хамтарч газрын үр шимийг хүртэгч иргэд, гэр бүлийн гишүүд хамтран нэг оролцогчийн хувьд уралдаанд оролцож болно.

Уралдааны болзол: Уралдаанд дүүргүүдийн Газрын алба тус бүр иргэдийн дундаас тодорхой 2 чиглэлээр газрын үр шимийг хүртэж буй тус бүр 1 иргэн /гэр бүл, хамтлаг/-ийг шалгаруулж материалыг ирүүлэх ба уралдаан зохион байгуулах ажлын хэсэг чиглэл тус бүрээр шалгаруулан байр эзлүүлж, өргөмжлөл, шагнал олгон, хэвлэл мэдээллийн хэрэгслэлээр сурталчилна. Энэхүү 2 чиглэл нь: 1. Хөрсний үржил шимийг ашиглан өмчилсөн газрын үр шимийг хүртсэн /төмс, хүнсний ногоо, жимс, жимсгэнэ тариалсан, хүлэмжийн аж ахуй хөгжүүлсэн зэрэг/ 2. Өмчилсөн газрыг үл хөдлөх хөрөнгийн хувьд ашиглан үр шимийг хүртсэн /газрыг барьцаалан зээл авч жижиг дунд үйлдвэрлэл эрхлэх эхний болон түүнийг хөгжүүлэх, өргөтгөх хөрөнгө олж авсан, орон сууц барьсан зэрэг/ Шалгаруулахад газрын үр шимээс жилд олсон ашгийн хэмжээ, ашгийг гэр бүлийн амьдралд зохистойгоор зарцуулсан, эргэлтэд оруулсан байдал, бий болгосон ажлын байрны тоо, жижиг дунд үйлдвэрийн үйл ажиллагааны далайц, тогтвортой байдал зэрэг үзүүлэлтийг шалгуур болгоно. Уралдаанд оролцох материалыг дүүргийн Газрын алба боловсруулан фото зураг, видео бичлэгээр баяжуулан цаасан болон тоон хэлбэрээр ирүүлнэ.

Нэгдүгээр байр чиглэл тус бүрээр 1, тус бүр өргөмжлөл, 300 000 төгрөг,

Хоёрдугаар байр чиглэл тус бүрээр 1, тус бүр өргөмжлөл, 200 000 төгрөг,

Гуравдугаар байр чиглэл тус бүрээр 1, тус бүр өргөмжлөл, 100 000 төгрөг.

Хугацаа: Уралдааныг 2011 оны 9 дүгээр сарын 20-ноос 10 дугаар сарын 24-ний хооронд явуулах ба 10 дугаар сарын 24-нд зохион байгуулах ажлын хэсэг дүүргийн Газрын албадаас ирүүлсэн материалыг хүлээн авч 10 дугаар сарын 25-27-ны хооронд газар дээр үзэж шалгаруулна.