Жил бүр сургууль, цэцэрлэгүүд их болон урсгал засварт ордог. Боловсрол, соёл, шинжлэх ухааны яамнаас засварын ажилд энэ жил 600 сая төгрөгийг Нийслэлд төсөвлөжээ. Нийслэлийн Боловсрол, шинжлэх ухааны газрын Барилга, хөрөнгө оруулалт хариуцсан мэргэжилтэн Э.Баярмагнайгаас сургууль, цэцэрлэгүүд хичээлийн шинэ жилд бэлэн эсэхийг тодрууллаа.
-Сургууль, цэцэрлэгүүдийн засварын ажил хугацаандаа дуусах уу? Ажлын явц ямар байна вэ?
-Нийслэлийн хэмжээнд нийт 15 сургууль, 35 цэцэрлэгт засвар хийх төсөв батлагдсан. Үүний дагуу сургууль, цэцэрлэг бүрт тендер зарлаж, наадмын дараа засварын ажил эхэлсэн байгаа. Одоогоор зургаан сургууль, 14 цэцэрлэгийн засвар дуусчихсан. Бусад сургууль, цэцэрлэгийн засварын ажил 50 гаруй хувийн биелэлттэй байна. Энэ сарын 18-ны өдөр гэхэд засварын ажлууд бүгд дуусч, холбогдох газруудад нь хүлээлгэн өгнө.
-Засвар гэхлээр чухам ямар ямар ажил хийж байна вэ?
-Дээвэр, сантехникийн ажил голчлон сургуулиудад хийгдэж байна. Гэхдээ дээврийн засвар  жаахан удаашралтай байгаа. Учир нь нийслэлд бороо хэд хоног үргэлжлэн орж ажил саатсан. Цэцэрлэгүүдийн тухайд угаалгын өрөөний засвар, халуун хүйтэн ус, бохирын шугамын шинэчлэлтийн ажил хийгдэж байгаа.
-Төсвийн тодотголоор зарим сургууль, цэцэрлэгийн засварыг хийнэ гэж байсан?
-Найман сургууль, найман цэцэрлэгийн засварыг хийхээр төлөвлөөд байгаа. Төсвийн тодотгол хийгдээгүй байна л даа.
-Япон улсын "Жайка" олон улсын байгууллагын санхүүжилтээр хэд хэдэн сургуулийн өргөтгөлийн барилгыг барьж байгаа. Хэзээ ашиглалтад орох вэ?
-Дөрвөн сургуульд өргөтгөл хийж, нэг сургууль шинээр барьж байна. Нийт 900 орчим сая төгрөгийн төсөвтэй.
“Голомт", "Ирээдүй" цогцолбор, 33, 14 дүгээр сургуулийн барилгыг өргөт-гөж байгаа. Сонгинохайрхан дүүргийн нэгдүгээр хороонд шинэ сургууль баригдаж байна. Ирэх оны гуравдугаар сар гэхэд бүгд ашиглалтад орсон байх юм.