“Шинэ бүтээн байгуулалт” дунд хугацааны зорилтот хөтөлбөрийг хэрэгжүүлэхтэй холбогдуулан ЗТБХБ-ын сайд Х.Баттулга, ЭБЭХ-ний дэд сайд Т.Энхтайван ЗТБХБЯ-ны төрийн нарийн бичгийн дарга Ж.Бат-Эрдэнэ, Нийслэлийн барилга хот байгуулалтын төлөвлөлтийн газар УСУГ-ын удирдлагууд оролцсон нэгдсэн хуралдаан өчигдөр боллоо. Тус хуралдаанаар “Шинэ бүтээн байгуулалт” хөтөлбөрт багтсан Буянт-Ухаа, Яармаг, Баянголын аманд баригдах орон сууцны хорооллын инженерийн байгууламж, зураг төсөл, техник хангамж, шаардагдах хөрөнгийн талаар хэлэлцэж, санал бодлоо нэгтгэж, нэгдсэн ойлголтод хүрч ажиллахаар боллоо. Хөтөлбөрийн хүрээнд хийж буй судалгааны ажилтай ч танилцсан юм.

Яармагт 3500 айлын орон сууцыг эхний ээлжид барина

Яармаг, Буянт-Ухаад баригдах шинэ хорооллын шавыг энэ онд тавих саналыг Нийслэлийн барилга хот байгуулалт, төлөвлөлтийн газрынхан хуралд оролцогсдод тавьсан юм. Буянт-Ухаад 3550 айлын орон сууцны хорооллыг, Баянголын аманд 4000 айлын орон сууц барина. Баянголын амын 529 га-д 18 мянган айлын орон сууц барих төлөвлөгөө ч бий. 3500 айлын орон сууц бүхий хорооллыг шинэ бүтээн байгуулалт хөтөлбөрийн хүрээнд Яармагт барьсны дараагаар 7500 айлын орон сууцны барилгын ажил эхлэх юм.

Шинэ хорооллын дулааны шугамыг тавьж эхэлсэн

Баянголын аманд баригдах шинэ хорооллын дулааны хангамжийг шийдэхэд 11.2 км шугам тавихаас 4.8 км-ийг нь тавьжээ. Дулаан дамжуулах 10 төвөөр энэхүү хороололд оршин суух хэрэглэгчдийг дулаанаар хангах аж. Энэ талаар Нийслэлийн барилга, хот байгуулалт, төлөвлөлтийн газрын дулааны инженер Б.Цэрэнбалжид “Дулааны IҮ цахилгаан станцыг түшиглэн уур усны дулаан солилцуулагч станцыг барьж байгуулах шаардлагатай” гэлээ. Баянголын амын хорооллын барилга угсралтын ажилд 21.7 тэрбум төгрөг шаардлагатай гэх урьдчилсан тооцоо гарсан бол Яармагийн хорооллыг ашиглалтад оруулахад 400 тэрбум төгрөгийн хөрөнгө шаардагдах аж. Буянт-Ухаа хороололд 170-га-д 12 мянган айлын орон сууц барихаар төлөвлөжээ. 2008 онд 8.4 тэрбум төгрөгийн хөрөнгө оруулалтаар 11.6 км гол дулааны шугамын өргөтгөл Буянт Ухаад хийжээ. Харин оршин суугчдаа дулаанаар хангахын тулд 11 ширхэг дулаан дамжуулах төвийг барьж байгуулах хэрэгтэй гэнэ.