Ерөнхий сайд С.Батболд Сингапур Улсад албан ёсны айлчлал хийж байна. Энэ удаагийн Засгийн  газрын тэргүүний албан ёсны айлчлал есөн жилийн дараа болж байгаагаараа онцлог юм. Тиймээс ч хоёр тал энэхүү айлчлалд өндөр ач холбогдол өгч байна.

Айлчлалын эхэнд Ерөнхий сайд С.Батболд, Сингапурын Ерөнхий сайд Ли Хсиен Лүүнг нар албан ёсны хэлэлцээ хийлээ. Уулзалтын эхэнд Ерөнхий сайд С.Батболд хоёр орны худалдаа, эдийн засгийн хамтын ажиллагаа сүүлийн 10 жилд мэдэгдэхүйцээр идэвхжиж ирсэн. Цаашйд Монгол Улс Сингапур Улстай эдийн засгийн хамтын ажиллагааг өргөжүүлэн хөгжүүлэх бүхий л боломжийг ашиглан хамтран ажиллах сонирхолтой байгаагаа тэмдэглэн хэлсэн юм.
Түүнчлэн хоёр орны худалдаа, хөрөнгө оруулалтын хэмжээг нэмэгдүүлэх нөөц боломж бий. Ялангуяа уул уурхай, дэд бүтэц, үйлдвэрлэл мөн банк, санхүүгийн салбарт хамтран ажиллах боломж байгаа гэдгийг дурдсан.

Засгийн газрын тэргүүн хэлэхдээ "Эрдэс баялаг, эрчим хүчний салбарт Сингапур Улстай хамтран ажиллах сонирхолтой байна. Тухайлбал, өмнөд, говийн бүс нутагтаа манай улс дулааны цахилгаан станц, зэсийн баяжмал хайлуулах, боловсруулах үйлдвэр барихаар төлөвлөж байгаа. Иймд тус хоёр байгууламжийн техник, эдийн засгийн үндэслэлийг боловсруулахад Сингапур Улсын "Темасек холдинг" зэрэг томоохон компаниуд хөрөнгө оруулж хамтран ажиллахад манай Засгийн газар дэмжих болно" гэлээ.

Тэрбээр мөн хэлсэн үгэндээ Монгол Улс эрчимтэй хотжиж байгаа улс бөгөөд хүн амыг орон сууцаар хангах, ард иргэдийн амьдрах орчныг сайжруулах нь манай Засгийн газрын тулгамдсан асуудал болоод байна. Иймд бид хүн амаа орон сууцаар хангах асуудлыг иж бүрэн шийдсэн туршлагатай орон болох Сингапурын хот байгуулалтын туршлагаас судлах, техник туслалцааны хүрээнд зөвлөх авч ажиллуулах, Засгийн газрын дэвшүүлсэн хүн ам, орон сууцжуулах "Шинэ бүтээн байгуулалт" дунд хугацааны зорилтот хөтөлбөрт орсон "100000 орон сууц" төслийг хэрэгжүүлэхэд Сингапурын талтай хамтран ажиллах сонирхолтой байгаагаа илэрхийллээ.

Албан ёсны айлчлалаар Сингапур улсад хүрэлцэн ирсэнд Монгол Улсын Ерөнхий сайд С.Батболдод Сингапурын Ерөнхий сайд Ли Хсиен Лүүнг талархал илэрхийлээд, цагт баригдалгүй чөлөөтэй уулзах боломж гарч байгаад сэтгэл хангалуун байгаагаа хэллээ.

Тэрбээр тус улсын анхны Ерөнхий сайд, Сингапурын эдийн засгийн хөгжлийн эцэг гэгддэг Ли Кван Югийн хүүхэд гэдгээрээ олон улсад танил болсон юм. Монгол Улс хөгжлийн шинэ үеийн гараанд байгааг Сингапурын Ерөнхий сайд  тэмдэглэлээ. 

Тэрбээр манай улсын талаарх мэдлэг нимгэн гэдгээ нуугаагүй ч саяхан Монгол Улсад болсон Азийн парламентын чуулганд оролцсон төлөөлөгчид нь Монголын талаар маш сайхан сэтгэгдэлтэй ирснээ Ерөнхий сайдтайгаа хуваалцсаныг ноён Лүүнг зочиндоо сонирхуулан хэлсэн.

Гадаа хасах 35 хэмийн хүйтэн байсан ч сэтгэл нь халуун, цог золбоотой ард түмэн юм байна, улс нь хурдтай хөгжих замдаа оржээ гэдэг мэдээллийг Сингапурын парламентын төлөөлөгчид нь Засгийн газрын тэргүүндээ хэлжээ.

Монгол Улсын Ерөнхий сайд С.Батболдын Сингапурт хийж байгаа албан ёсны айлчлал нь хоёр улсын харилцаа, хамтын ажиллагааг шинэ төвшинд гаргахад чухал үүрэг гүйцэтгэнэ гэдэгт итгэлтэй байгаагаа ч Сингапурын Засгийн газрын тэргүүн илэрхийллээ.

Мөн Монгол Улсын Ерөнхий сайдын хөндөж тавьсан салбаруудад, тухайлбал орон сууц, боловсрол, эрүүл мэнд, банк санхүүгийн салбарт олсон ололт амжилт, туршлагаасаа хуваалцахад бэлэн буйгаа ч дуулгасан юм гэж Засгийн газрын хэвлэл мэдээллийн албанаас мэдээллээ.