Монгол Улсын Ерөнхийлөгч Ц.Элбэгдорж Нийслэлийн агаарын бохирдлыг бууруулах тухай хуулийн төслийг боловсруулаад байгаа билээ. Тэгвэл өчигдөр Ерөнхийлөгчийн дэргэдэх "Иргэний танхим"-д нээлттэй хэлэлцүүлж, УИХ-ын зарим гишүүн, холбогдох яам, нийслэлийн удирдлага, төрийн бус байгууллагын төлөөлөл, Мянганы сорилын сангийн төслийнхөн оролцож саналаа илэрхийлсэн юм. Хэлэлцүүлгийн эхэнд Ерөнхийлөгчийн тамгын газрын дарга Д.Баттулга хуулийн төслийн талаар танилцуулга хийсэн. Энэ хуулиар агаарын чанарыг сайжруулах бүсийг тогтоож, тэнд мөрдөх дэглэм, эрх зүйн байдалтай холбогдсон харилцааг зохицуулах аж. Хязгаарлалтын бүсэд дэнжийн мянга, зуун айл, гуравдугаар хорооллын арын гэр хороолол орж байгаа юм байна. Шөнийн эрчим хүчний хөнгөлөлттэй горимд оройн 06 цагаас өглөөний 10 цаг гэж тусгажээ. Өнөөгийн мөрдөж буйгаар шөнийн үнэ тарифийг нь 50 хувь хөнгөлж, нэг киловаттыг 20 төгрөг болгох, дэд станц, тоолуурын найдвартай ажиллагааг хангах, төсвийн тодотголоор хөрөнгийн асуудлыг шийдвэрлэх, УИХ-ын дэргэд агаарын бохирдлын эсрэг үндэсний хороо байгуулах, утаагүй түлш хэрэглэж буй айл өрхөд хөнгөлөлт үзүүлэх, хууль зөрчсөн иргэн, албан тушаалтанд хариуцлага тооцох асуудлуудыг хуулийн төсөлд мөн тусгаж өгчээ. Хуулийн төслөө ирэх баасан гаригт УИХ-д өргөн барьж чуулган завсарлахаас өмнө хэлэлцүүлэх бодолтой байгаагаа Д.Баттулга дарга дуулгасан юм.

УИХ-ын гишүүн С.Оюун: Тавдугаар цахилгаан станцыг хамгийн хурднаар хэзээ барьж дуусгах боломж байна, энэ хүртэл хууль гарлаа гэхэд хэрэгжих боломж бий юу? гэж асуусан юм. Харин Тамгын газрын дарга Д.Баттулга "ОХУ-ын Галуут нуурын станцаас 40, дотоодоосоо 25-30 мВт-ын боломж бий болгох тооцоо бий. Ингэснээр 30 мянган айл хамруулах нөхцөл бүрдэнэ. Мянганы сорилтын сангийн төслөөр гэрийн дулаалга, зуух, халаагуур хөнгөлөлттэй үнээр олгоно. Тавдугаар цахилгаан станцыг гурав-дугаар цахилгаан станцын буурин дээр байгуулах, ингэхдээ шуурхай хийвэл энэ ондоо эхний зуухыг ашиглалтад оруулах боломж бий" гэлээ.

Тоос шорооноос агаар их бохирдож байна. Энэ талаар юу тусгав. Хүн амын механик өсөлтийг яаж зохицуулах вэ гэсэн оролцогчийн асуултад тэрээр "Улаанбаатарын хөрс бүхэлдээ бохирдсон, дахин нөхөн сэргээх боломжгүй. Хүн амын өсөлтийг өөр хуулиар зохицуулна гэж хариулсан юм. Энэ талаар Нийслэлийн эрх зүйн байдлын тухай хуулийн төсөлд тодорхой зүйл тусгасан аж.

Харин УИХ-ын гишүүн Г.Баярсайхан Агаарын бохирдолд хүүхэд хамгийн их хорддог тул нийслэлийн эргэн тойрны олон амралт, зусланд тэднийг амрааж байя гэсэн санал гаргасан бол Нийслэлийн Засаг дарга Г.Мөнхбаяр шингэрүүлсэн хийн түлшний үйлдвэр мэт хувийн хэвшлийн хийж болох зүйлийн тоног төхөөрөмжүүдийг НӨАТ, гаалийн татвараас чөлөөлөх асуудлыг оруулах санал гаргав. Түүнээс гадна УИХ-ын гишүүн Л.Гантөмөр стандартад нийцсэн халаагчийг ийм хөнгөлөлтөд хамруулах хэрэгтэй гэж нэмэв. Энэ мэтчилэн хүмүүс олон санал хэлсэн юм.

Тухайлбал иргэдийн оролцоо дэмжлэгийн тухай тусгах, хар тугалгатай бензин, дизелийн түлш хэрэглэхийг хориглох, агаарын бохирдлын хор холбогдлын талаар мэдээлэл сурталчилгаа хийх, хуулийг хэрэгжүүлэх хөрөнгийн эх үүсвэрийг заах, сэргээгдэх эрчим хүч ашиглах, угаасан нүүрс хэрэглүүлэх, гэр хороолол төдийгүй зусланг хуульд хамруулах, хуучин машин гаднаас оруулахыг жилээр нь хязгаарлах, хуулийг тодорхой хугацаанд хэрэгжүүлээд зогсоох талаар олон санал гарсан.

Мөн Агаарын бохирдлын эсрэг үндэсний хороог Ерөнхийлөгчийн дэргэд байгуулах нь зөв гэх хүмүүс ч байв. Ерөнхийлөгчийн Тамгын газрын дарга Д.Баттулга саналуудыг ажлын хэсэг авч үзнэ гэдгийг хэлэлцүүлэгт оролцогсдод мэдэгдсэн юм.

Б.Жаргал