Нийслэлийн Засаг дарга бөгөөд Улаанбаатар хотын захирагч Г.Мөнхбаяр өнгөрөгч оны 11 сард Итали улсын аж үйлдвэрийн гол хот болох Миланд албан ёсны айлчлал хийгээд ирсэн. Энэ айлчлалын үеэр 2011 оны 6-р сард Монгол улсад Италийн соёлын өдрүүдийг “Хот байгуулалт Архитектур” сэдвийн дор зохион байгуулахаар болсон. Италийн соёлын өдрүүдийн урьтал болгон Итали дахь Монголын өргөмжит консул Ц.Гантуяа Миланы Политехникийн Их Сургуулийн профессор, архитектор Жулиана Салмазо, “Favero and Milan” компаний захирал, инженер Маурицио Милан нар хотын мээрийн урилгаар Монгол улсад хүрэлцэн ирээд байна. Айлчлал 7 хоногийн хугацаатай үргэлжлэх бөгөөд өчигдөр мэргэжил нэгтүүд буюу Нийслэлийн Барилга, хот байгуулалт, төлөвлөлтийн газар, нийслэлийн Зураг төслийн хүрээлэнгийн архитекторуудтай уулзалт хийж, “Хот байгуулалтын үзэсгэлэн”-г үзэж сонирхлоо.

Улаанбаатар хотын Ерөнхий архитектор Э.Хүрэлбаатар уулзалтын эхэнд “Архитектур нь өөрийн төлөвлөлт, орон зайн шийдэл, уран сайхны дүр төрхөндөө ард түмний түүх, зан заншил уламжлалыг тусгадаг учраас хүн төрлөхтөний оюун санааны тусгал нь болж байдаг. Итали улс архитектурын арвин баялаг туршлага түүх дурсгалын өлгий нутаг учраас мэргэжил нэгт та нөхөдтэй өөрийн эх орондоо уулзалт хийх боломж гарсанд баяртай байна. Улаанбаатар хотыг анх төлөвлөхдөө 500 мянган хүн амьдрахаар тооцоолсноос өнөөдөр бидэнд маш их бэрхшээл тулгараад байгаа. Энэ бэрхшээлийг даван туулахаар 2002 онд батлагдсан Ерөнхий төлөвлөгөөнд тодотгол хийх ажлыг эхлүүлж буй түүхэн цаг мөчид бидний уулзалт болж байгаа нь үнэхээр онцлогтой. Тиймээс бидэнд санал болон туршлага солилцох нь маш чухал” хэмээн хэлсэн.

Уулзалтын үеэр архитектор Жулиана Салмазо: Та бүхэн хотын төвийнх аль хэсэгт зугаалах дуртай вэ? гэсэн асуултыг тавьж, архитектор хүн төлөвлөлт хийхдээ хүмүүсийн дурсамж үлдээсэн очих дуртай тэр л газраас төлөвлөлтөө эхлүүлэх нь зүйтэй байдаг. Мөн оршин суугч иргэдийн санал, үзэл бодолд үндэслэн бүтээн байгуулалт хийх нь үр дүнтэй гээд цаашид хамтран ажиллахаа мэдэгдсэн. Харин инженер Маурицио Милан “Улаанбаатар хотын хөгжил дэвшил бүтээн байгуулалтыг өөрийн нүдээр үзэхийг хүссэн бөгөөд үзэж чадсандаа баяртай байна. Ер нь улс оронд тогтвортой хөгжил хамгийн чухал бөгөөд эрчим хүч, агаарын бохирдлыг шийдэх арга замаа зөв тодорхойлбол их хөрөнгө хэмнэх боломжтой бөгөөд тэрхүү хэмнэлтээр бүтээн байгуулалтын ажлыг өрнүүлэх боломжтой” байдгийг онцолсон.