Сар шинийн баярын өмнө байгууллага бүр ахмад буурлуудаа хүлээн авч уулзан, гарын бэлэг гардуулдаг. Нийслэлийнхэн ч энэ уламжлалын дагуу өнөө жил ахмадуудаа хүлээн авч уулзахдаа тэдний магнайг тэнийлгэсэн нэгэн сюрприз барилаа. Нийслэлийн Засаг даргын Тамгын газарт бүртгэлтэй нийслэлийн төр, захиргааны байгууллагад ажиллаж байгаад тэтгэвэртээ гарсан 89 ахмад бий.

Тэд хотын даргатай уулзахдаа ганц асуудал тавьдаг нь орон сууц олгож өгөх хүсэлт байдаг. Гэхдээ нэгэнт төр засгаас ахмадуудад орон сууц олгох боломж байхгүй байгаа учир нийслэлийнхээ хөгжил цэцэглэлтийн төлөө хүч хөдөлмөрөө өгч зүтгэсэн ахмад буурлуудынхаа энэхүү хүсэлтийг шийдвэрлэх боломж олох арга замыг хотын дарга хайж, одоо хэрэгжиж буй төрийн албан хаагчдад зориулсан хөнгөлөлттэй зээлийн орон сууцны хөтөлбөрөөс тусад нь нийслэлийн ахмадууддаа зориулсан хөнгөлөлттэй зээлийн орон сууцны хөтөлбөр хэрэгжүүлэх санаа гарган, хурлын даргад танилцуулан дэмжлэг авснаа өнөөдөр ахмадуудаа дуулгалаа.

Энэ санаачилгаа ажил хэрэг болгохоор Орон сууц санхүүжилтийн корпорацийн удирдлагыг уулзалтад урьсан бөгөөд тэрбээр хотын удирдлагуудын энэ санаачлагыг хүлээн авч, онцгой анхаарал тавьж ажиллахаа амласан байна.