Зураг төсөлд магадлал хийх орон тооны бус экспертүүдийн зөвлөгөөн боллоо
Barilga
2019-11-05
Зураг төслийн баримт бичигт, зураг төсөлд магадлал хийх орон тооны бус экспертүүдийн зөвлөгөөн 2011 оны 01 дүгээр сарын 26-нд Чингис зочид буудлын хурлын танхимд болж өндөрлөлөө. Тус зөвлөгөөнийг Зам тээвэр, барилга, хот байгуулалтын яам, Газрын харилцаа, барилга, геодези, зураг зүйн газраас зохион байгуулсан юм. Зөвлөгөөнд ЗТБХБЯ-ны БОСНАА-ны бодлогын газрын дарга Б.Баасан, ГХБГЗЗГ-ын дарга Ц.Ганхүү, дэд дарга Б.Баярсайхан, БНААА-ны дарга Д.Гантулга ,Зураг төсөл зохиогчдын холбооны тэргүүн Г.Мягмар болон орон тооны бус экспертүүд, холбогдох албаныхан оролцсон юм.
Зөвлөгөөнийг ГХБГЗЗГ-ын дарга Ц.Ганхүү нээж үг хэлсэн бөгөөд зураг төслийн талаар төрөөс баримталж буй бодлогын талаар ЗТБХБЯ-ны БОСНАА-ны бодлогын газрын дарга Б.Баасан, зураг төслийн баримт бичигт магадлал хийх, үйл ажиллагааг боловсронгуй болгохтой холбогдуулан хийж буй ажлын талаар БНААА-ны дарга Д.Гантулга мэдээлэл өгсөн юм. Энэ үеэр экспертүүд зураг төсөл зохиох ажлын үнийг нэмэх, эрх зүйн орчинг сайжруулж зөрчилдөөд буй хуулиудыг цэгцлэх хэрэгтэй байгаа талаар саналаа хэлсэн. Мөн зураг төслийн стандартуудыг шинэчлэх, чадамжтай зураг төслийн байгууллагуудад магадлал хийх эрх олгож байх, залуу мэргэжилтнүүдийг сургаж дадлагажуулах шаардлагатай байгааг экспертүүд онцолж байв.Харин яам болон агентлагийн зүгээс экспертүүдийг ЗТБХБ-ын сайдын тушаалаар баталсан өндөр барилгын төлөвлөлтийн норм, уул уурхайг дагасан шинэ техник технологийн зураг төсөлд магадлал хийх ажилд суралцах, Засгийн газраас баталсан “Шинэ бүтээн байгуулалт ” хөтөлбөртэй ажил үйлчилгээгээ уялдуулахыг анхаарууллаа. Зөвлөгөөнөөс экспертүүдийн гаргасан саналуудыг үндэслэн зөвлөмж гаргаж, нэгдсэн шийдвэрт хүрсэн юм.
